Ministru Komérsiu no Indústria, Filipus Nino Pereira iha programa “Página do Governo” edisaun da-10, ne’ebé sei fó-sai iha sesta-feira ne’e, loron 8 fulan-agostu 2025, tuku 8:00 kalan, iha Rádiu no Televizaun Timor-Leste (RTTL) no plataforma dijitál sira.  

Iha entrevista ida-ne’e, Ministru destaka katak ekonomia tenke sai pilár fundamentál atu hadi’a moris-di’ak ba nasaun ida-ne’e no ninia povu. Tanba ne’e, ami define ona prioridade sira”.  Nia salienta tan katak “dezenvolvimentu institusionál, ida ne’e foka liu ba oinsá ita bele haforsa kapasidade instituisaun sira nian, kona-ba rekursus umanus, no mós koordenasaun kooperasaun ne’ebé ita dezenvolve ho entidade hotu-hotu”. 

Nino Pereira subliña katak sira-nia parte halo esforsu barak ona durante ne’e, liu-liu iha planu asaun lejizlativa. Sira konsidera ida ne’e importante tebes atu asegura no promove ambiente negósiu ida ne’ebé di’ak, tantu ba setór komersiál no industriál. Razaun ida ne’e, mak Governu aprova tiha ona Dekretu-Lei balun kona-ba ida-ne’e. 

“Prioridade seluk mak ita-nia adezaun ba Organizasaun Mundiál Komérsiu (OMK), no ita agora iha prosesu atu adere ba ASEAN”, salienta Ministru, no nia hatutan tan katak “Husi pakote lei ne’ebé ita iha, ita konsege aprova Dekretu-Lei 14, ne’ebé importante tebes, hanesan ohin ita temi, hodi hametin ita-nia atividade iha komérsiu no indústria”. 

Ikusliu, Membru Governu ne’e aprezenta vizaun ida ba futuru Timor-Leste nian, kona-ba ita-nia rain nia setór komersiál no industriál, hodi hateten katak vizaun ida-ne’e halo investimentu maka’as no oportunidade merkadu sei sai boot liu, ida-ne’e pontu forte ida ba timoroan sira.

 “Tanba ne’e, mak ita presiza organiza no prepara ita-nia an di’ak liután, no motiva ita-nia setór privadu, tanba ida-ne’e oportunidade ida. Ita presiza iha rede negósiu ne’ebé forte bainhira ita tama iha kompetisaun globál”, nia destaka. 

Programa “Página do Governo” hanesan inisiativa konjunta ida husi Gabinete Portavós Governu nian, ne’ebé lidera husi Ministru Prezidénsia Konsellu Ministrus, Agio Pereira, RTTL, mídia nasionál no plataforma dijitál sira, ho objetivu atu hametin transparénsia governu no garante asesu informasaun ba populasaun kona-ba asaun no desizaun prinsipál sira Ezekutivu nian.

Programa ne’e konta ho Nélia Chaves hanesan aprezentadora no Ika Moniz hanesan produtora ezekutiva, no apoiu tékniku hosi ekipa komunikasaun Gabinete Primeiru-Ministru nian, hosi Prezidénsia Konsellu Ministrus no gabinete hosi membru Governu ne’ebé hetan entrevista.

Portavós Governu, Ministru Agio Pereira, reafirma katak “Página do Governo” nu’udar instrumentu importante ida hodi promove prestasaun kontas no diálogu entre Ezekutivu no sidadaun sira.

Governu konvida sidadaun hotu-hotu atu akompaña edisaun “Página do Governo” ida-ne’e, ne’ebé sei transmite iha sesta-feira, loron 8 fulan-agostu tinan 2025, tuku 8 kalan, liuhosi RTTL no rede sosiál sira, hodi kontribui ba sosiedade ida ne’ebé informadu, partisipativu no komprometidu liu ba dezenvolvimentu Timor-Leste nian.