Gravasaun Epizódiu da-15 husi Programa “Página do Governo” ho Ministru Defeza
Ministru Defeza, Donaciano do Rosário Gomes, ohin, loron 5 fulan-agostu tinan 2025, partisipa iha gravasaun “Página do Governo” epizódiu ba da-15, ne’ebé iha tempu besik sei tranzmite husi Rádiu no Televizaun Timor-Leste (RTTL) no divulga iha media nasionál sira no iha rede sosiál sira. Gravasaun ne’e halo iha estúdiu Palásiu Governu. 
Durante entrevista ne’e, Ministru Defeza aborda prioridade no área intervensaun prinsipál sira husi ninia mandatu no empeñamentu Ministériu Defeza nian durante tinan rua ida ne’e nia laran, hodi destaka, iha parte kuadru defeza seguransa ba forsas armadas sira, nebe’e hetan espasu husi povu no estadu ba sira nia autoridade no konfiansa ba forma atuasaun. 
Programa IX Governu nebe’e define ba Ministériu Defeza ba dezenvolvimento iha Instituisoens de Defeza no Seguransa, ne’ebé transparentes, efisientes, kompetentes no profisionais, sai fundamentál ba manutensaun ba demokrasia no ba konsolidasaun da estabilidade no pás, iha nível nasionál no internasionál. 
“Página do Governo” ne’e promove husi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Programa ne’e konta ho Nélia Chaves nu’udar aprezentadora, Ika Moniz nu’udar produtora ezekutiva, no apoiu tékniku husi ekipa mídia sira Gabinete Primeiru-Ministru nian, Gabinete Portavós Governu, no hosi Gabinete membru Governu nian ne’ebé hetan entrevista. Inisiativa ida-ne’e ho objetivu atu hametin transparénsia no prosimidade entre Ezekutivu no sidadaun sira, hodi permite ba populasaun atu akompaña, ho dalan asesivel no informadu, asaun prinsipál no polítika públika sira ne’ebé la’o hela. 
Iha sesta semana ne’e, loron 8 fulan-agostu, tuku 8 kalan, sei transmite epizódiu Ministru Komérsiu no Indústria, Filipus Nino Pereira, hanesan Nai-ulun nebe'e maka iha kompeténsia atu propoin polítika no elabora lejizlasaun no regulamentu sira ne'ebé nesesáriu ba áreas ne'ebé nia tutela ho objetivo atu dinamiza atividade ekonómika no aumenta kompetitividade nasionál no internasionál. Governu konvida sidadaun hotu-hotu atu akompaña transmisaun ne’e, ne’ebé sei fó-sai iha RTTL no iha rede sosiál ofisiál sira. REMATA 
