Iha loron 24 fulan-Jullu, Primeiru-Ministru Kay Rala Xanana Gusmão simu Robyn Cahill, Ministru Komérsiu, Negósiu no Relasaun Aziátika Territóriu Norte Austrália nian, iha Palásiu Governu, iha ámbitu vizita ofisiál ida mai Timor-Leste ne’ebé hakarak hakle’an kooperasaun bilaterál iha áreas prioritária ba Governu rua ne’e. 

Durante enkontru, ko’alia kona-ba oportunidades hodi hametin kooperasaun iha ámbitu hosi Akordu Estratéjiku Parseria nian, ho énfaze liuliu ba jestaun sustentável hosi populasaun krokodilu tasi nian, kestaun ida ne’ebé sensivel ba komunidade sira iha tasi-ibun timor nian. Vizita ne’e mós inklui diskusaun kona-ba edukasaun, empregu, saúde, agronegósiu, akuakultura, ambiente, no interkámbiu tékniku no akadémiku. 

Delegasaun Austrália ne’e mós hasoru malu ho Vise-Primeiru-Ministru no Ministru Koordenadór Asuntu Ekonómiku, Prezidente Repúblika no Ministru Negósiu Estranjeiru no Kooperasaun.

Programa vizita ne’e inklui vizita ba instituisaun kulturál no sientífika nasionál oioin, inklui Arkivu no Muzeu Rezisténsia Timorense no Sala Leitura Xanana Gusmão. Ministra mós vizita fasilidade Menzies School of Health Research iha Dili, iha ne’ebé nia haree esforsu saúde públika ne’ebé la’o hela, liuliu programa peskiza kona-ba moras tropikál sira hanesan denge. 

Vizita ne’e hanesan parte husi intensifikasaun relasaun entre Timor-Leste ho Territóriu Norte Austrália nian, iha ámbitu parseria estratéjiku ida ne’ebé hakarak promove benefísiu mútua no kontribui ba dezenvolvimentu sustentável rejiaun rua ne’e nian.