Ministériu Turizmu, Komérsiu no Indústria (MTCI) inaugura ona sede ba Grupu Hadomi Produtu Lokal (HPD) iha suku Boruma, sub-distritu Baucau Vila.
Objetivu prinsipál hosi grupu HPL atu kompleta tan sede ne’ebe hetan ona inaugurasaun ne’e motiva liután sira nia grupu atu kontribui ba dezenvolvimentu produtu lokál, nune’e bele atende nesesidade konsumidór sira nian iha rai-laran no bele mós kompete ba merkadu internasionál.
Sede ne’ebé hetan apoiu aleinde hosi MTCI, konstruksaun sede ne’e hetan apoiu mós hosi Sentru Dezenvolvimentu Komunitáriu (SDK) distritu Baucau.
Xefi Gabineti MTCI, Henrique Carlos, ne’ebé inaugura ofisialmente sede HPL ne’e husu atu grupu ne’ebé hetan apoiu tenke uza ho didi’ak, hadi’a kualidade produsaun atu nune’e bele kompete di’ak liu iha merkadoria. “Produtu ne’ebé imi iha, imi prodús tenke iha kualidade atu nune’e bele hetan simpatia hosi konsumidór sira hosi lokál no mós internasionál,” subliña Xefi Gabineti MTCI.

Inspetora Jerál ba Seguransa Alimentár no Ekonomika, señora Florentina Smith, subliña katak nia parte sei fó apoiu di’ak liután ba grupu atu dezenvolve-an di’ak liután. “Ami sei la taka-matan ba grupu ne’ebé de’it mak mosu, ami hakarak haree sira sériu bainhira hala’o atividade atu nune’e apoiu ne’ebé sira hetan la saugate de’it,” nia dehan.
Prezidente Komité SDK, Padre Martinho Gusmão, iha biban ne’e hatete, nia hein hosi parte Governu ho politika ne’ebé iha bele fó apoiu di’ak liután ba grupu HPL no grupu seluk iha Timór- laran tomak atu partisipa iha dezenvolvimentu nasionál. “Ami nia observasaun timór-oan sira iha kompromisu di’ak, maibé presiza tebes apoiu hosi Governu atu dezenvolve produtu lokál ho kualidade no kuantidade,” nia hatete.