Timor-Leste partisipa iha Sorumutu Ordinária Konsellu Ministrus Comunidade dos Países de Língua Portuguesa (CPLP) nian ba da-30 no iha Konferénsia Xefes Estadu no Governu CPLP nian ba da-15, ne’ebé hala’o hosi loron 17 to’o 18 fulan-jullu, iha Bissau, ho lema “CPLP no Soberania Alimentár: Dalan ida ba Dezenvolvimentu Sustentavel”. Delegasaun timoroan ne’ebé lidera hosi Prezidente Repúblika, José Ramos-Horta, no inklui Ministru Administrasaun Estatál, Tomás do Rosário Cabral, ne’ebé reprezenta ofisialmente Ministru Negósius Estranjeirus no Kooperasaun.

Iha Sorumutu Ordináriu Konsellu Ministrus CPLP nian, Tomás do Rosário Cabral reafirma kompromisu Timor-Leste nian ba reforsu seguransa alimentár no nutrisionál iha espasu luzófonu. “Timor-Leste rekoñese katak direitu umanu ba hahán ida ne’ebé adekuada no saudavel hanesan prosesu ida ne’ebé la’o hela no konsiente kona-ba dezafiu sira ne’ebé nia implementasaun atu hamenus hamlaha”, nia deklara hodi subliña revizaun ba Polítika Nasionál Seguransa Alimentár no Nutrisionál, ne’ebé aliña ho Estratéjia Seguransa Alimentár no Nutrisionál CPLP nian (ESAN-CPLP). Nia destaka mós kriasaun Komisoins Munisipais ba Seguransa Alimentár no aprovasaun Planu Asaun Nasionál ba Nutrisaun Multisetoriál hodi Kombate Kra’es-badak 2024-2030 hanesan medidas estratéjikas atu mellora nutrisaun infantíl no garante seguransa alimentár iha país ne’e. 

Governante ne’e realsa mós adezaun Timor-Leste nian ba Aliansa Globál kontra Hamlaha no Moris-ki’ak no Koligasaun Alimentasaun Eskolár, ne’ebé konsidera “plataforma kooperasaun globál ida hodi promove alimentasaun ida ne’ebé adekuada, ekilibrada no saudavel iha eskola sira, liuhusi mobilizasaun rekursus sustentaveis”. Nia hatutan katak “Timor-Leste iha entendimentu ne’ebé hanesan katak povu no Estadus soberanus iha direitu atu determina sira-nia polítikas agríkolas no alimentares ho forma demokrátika no inkluziva”, hodi reforsa kompromisu Governu Konstitusionál IX nian ba dezenvolvimentu sustentavel no fortalesimentu parserias internasionais iha ámbitu CPLP no ASEAN nian. 

Tomás do Rosário Cabral aproveita mós hodi “husik ba CPLP dezafiu atu hakle’an kooperasaun ho ASEAN, espasu rejionál integrasaun naturál nian ba Timor-Leste, ne’ebé ami hein atu sai membru plenu direitu iha tempu badak”.

Simeira, ne’ebé selebra aniversáriu CPLP ba da-29, marka ho aprovasaun ba Deklarasaun Bissau, iha ne’ebé Xefe Estadu no Governu sira reafirma prioridade soberania alimentár no nutrisionál nu’udar elementu esensiál ba justisa sosiál no sustentabilidade planetária.

Iha ámbitu vizita ofisiál ne’e, Prezidente Repúblika, José Ramos-Horta, simu Medalla Amílcar Cabral, kondekorasaun nasionál ne’ebé aas liu iha Giné-Bissau, ne’ebé atribui ba rekoñesimentu ninia papél desizivu iha luta ba autodeterminasaun no independénsia Timor-Leste nian, nune’e mós ninia kontributu ba dame, demokrasia no solidariedade entre povu afrikanu no luzófonu. 

Simeira ne’e remata ho eleisaun ba Prezidente Repúblika Giné-Bissau nian, Umaro Sissoco Embaló, nu’udar Prezidente pro tempore CPLP nian ba tinan rua 2025–2027, no ho rekoñesimentu públiku ida ba Sekretáriu Ezekutivu sesante, Zacarias Albano da Costa, tanba “serbisu ne’ebé hala’o ona hodi hametin Sekretariadu  Ezekutivu, iha melloria ba ninia funsionamentu no ninia kapasidade resposta”, nune’e mós ba “serbisu ne’ebé hala’o ona iha setór oioin kooperasaun nian, ho sosiedade sivíl no ho parseiru internasionál sira”. 

Ministru Administrasaun Estatál termina ninia diskursu ho hato’o votus  susesu ba Konferénsia ne’e, hodi hateten: “Ami dezeja sei sai sesaun traballus ida ne’ebé produtiva no hato’o ho laran-tomak ami-nia votus mandatu ida ne’ebé di’ak ba atuál Prezidénsia Konsellu Ministrus CPLP nian”.