Ministru Prezidénsia Konsellu Ministrus, Agio Pereira, hasoru malu iha loron 17 fulan-jullu tinan 2025, ho Prezidente Konsellu Administrasaun Rádiu no Televizaun Timor-Leste, EP (RTTL, EP), Elizeu Isaac Fernandes, ho nia ekipa, hodi analiza rezultadu serbisu empreza públika nian no diskute kona-ba dezafiu prinsipál ne’ebé identifika ona. 

Iha sorumutu ne’e, ekipa RTTL aprezenta avaliasaun kona-ba ninia atividades no reafirma kompromisu empreza nian atu kontinua fó sai informasaun loloos ne’ebé aliña ho orientasaun governu nian ba setór ne’e, hodi garante atendimentu públiku ida ne’ebé responsavel no transparente.

Ministru Agio Pereira rekoñese RTTL nia knaar estratéjiku nu’udar mídia públiku, agradese ba nia servisu, no destaka kolaborasaun pozitivu ho Gabinete Portavós Governu nian, liuliu iha ámbitu programa Página do Governo, ne’ebé ajuda ona atu mantein públiku informadu kona-ba Ezekutivu atuál nia rezultadus. Ministru mós hato’o nia vontade atu fó apoiu ba RTTL hodi ultrapasa dezafiu sira ne’ebé hasoru no enkoraja ekipa ne’e atu mantein profisionalizmu no responsabilidade bainhira hala’o ninia kna’ar sira. 

Elizeu Isaac Fernandes, ne’ebé asume prezidénsia RTTL nian iha loron 13 fulan-marsu tinan 2025, hanoin hikas iha nia diskursu tomada-de-pose nian katak “RTTL la’ós de’it meiu komunikasaun ida, maibé pilár ida hosi demokrasia Timor-Leste”, hodi kompromete atu “garante katak empreza públika ida-ne’e kontinua serbí interese públiku ho profisionalizmu no rigór informativu”.