Espozisaun Internasionál Dili 2025 (Dili International Expo 2025 – DITE-2025), ne’ebé sei hala’o iha Centro de Convenções de Díli, husi loron 28 fulan-agostu to’o loron 1 fulan-setembru 2025, sei sai hanesan espozisaun internasionál dahuluk ne’ebé organiza iha Timor-Leste husi Ministériu Komérsiu no Indústria. Objetivu no misaun mak atu halibur nasaun sira, empreza ki’ik no médiu sira, negósiu sira, ONG sira no organizasaun governamentál sira hodi aprezenta sira-nia susesu, hatudu inovasaun sira ne’ebé foun tebes iha kultura no teknolojia, no promove kolaborasaun entre setór oioin.

Eventu ne’e sei inklui programa oin-oin, hanesan promove negósius no produtus, talk shows (ou debate) ao vivo (ne’ebé halo iha fatin), sorumutu business match-making, asinatura memorandu entendimentu (MoU) entre empreza sira (B2B), espozisaun arte no kultura, aprezentasaun múzika ao vivo (ne’ebé halo iha fatin) ho artista nasionál sira, aprezentasaun hosi universidade no empreza sira kona-bá peskiza no inovasaun, aprezentasaun oportunidade negósiu no investimentu hosi ajénsia governamentál sira no Kámara Komérsiu no Indústria Timor-Leste (CCI-TL), no mós aprezentasaun kona-ba apoiu empréstimu no kréditu husi BNCTL.

Espozisaun ne’e sei hatudu pavillaun sira ho tema, oportunidades networking no esperiénsia kulturál, hodi enkoraja koneksaun globál. Tanba Timor-Leste nu’udar membru OMK no iha hela prosesu atu adere ba ASEAN, eventu ida-ne’e sei sai nu’udar eventu dahuluk husi tipu ida-ne’e atu to’o iha merkadu mundiál. Sei fó oportunidade ba komersiantes, fabrikantes no industriál nasionál no internasionál sira atu kolabora no investe iha Timor-Leste. Konseitu “make it and brand it” hakarak koloka produtu “Made in Timor-Leste” iha merkadu ASEAN no merkadu mundiál.