……………………………………………………………………………………………………………
Komunikadu Imprensa
Loron 15, fulan-jullu, tinan 2025
Governu Hato’o Parabéns ba Funsionáriu Públiku sira iha Loron Nasionál Funsaun Públika
Governu Konstitusionál da-9 hato’o parabéns ba funsionáriu públiku tomak iha selebrasaun Loron Nasionál Funsaun Públika, data ne’ebé estabelese hosi Rezolusaun Governu n. 22/2015, loron 15 fulan-jullu. Objetivu hosi selebrasaun ida-ne’e atu rekoñese knaar esensiál Funsaun Públika nian ba interese públiku, respeita direitu no interese lejítimu sidadaun no instituisaun nian no kompromisu atu hakbesik servisus ba populasaun sira, hanesan estabelese ona iha Konstituisaun Repúblika.
Hili loron 15 fulan-jullu iha relasaun ho publikasaun Lei n. 5/2009, ne’ebé halo revizaun ba Estatutu Funsaun Públika, no Lei n. 7/2009, ne’ebé kria Komisaun Funsaun Públika, entidade fundamentál sira iha estruturasaun funsaun públika ida ne’ebé efisiente no ba servisu komún ne’ebé di’ak. Governu fó hanoin mai ita katak Funsaun Públika kompostu hosi sidadaun sira ne’ebé maka presiza hatudu dedikasaun tomak atu serbí Estadu, kontribui ba konstrusaun instituisaun sira no dezenvolvimentu sosiedade ida ne’ebé justu liu.
Ministru Prezidénsia Konsellu Ministrus no Portavós Governu nian, Agio Pereira, subliña importánsia husi data ida-ne’e, hodi haktuir katak “Loron Nasionál Funsaun Públika hanesan tempu ida atu fó onra ba mane no feto sira ne’ebé, ho kompromisu no sentidu responsabilidade, kontribui ona hodi hametin Estadu no hadi’a servisu sira ne’ebé hala’o ba populasaun. Governu rekoñese esforsu no dedikasaun hosi funsionáriu hotu-hotu, ne’ebé sai pilár fundamentál iha konsolidasaun ita-nia administrasaun no dezenvolvimentu nasaun nian”.
Governu reafirma nia kompromisu atu kontinua investe iha reforsu ba kapasidade sira Funsaun Públika nian, ho objetivu atu garante servisus ne’ebé besik liután, efikás liután no tuir nesesidade sira populasaun nian.