Ministru Komérsiu no Indústria, Nino Pereira, iha loron 11 fulan-jullu tinan 2025, partisipa iha sesaun abertura Forum Emprezariál kona-ba Oportunidades Kooperasaun Komersiál kona-ba Kooperasaun Komersiál entre Indonézia no Timor-Leste, ne’ebé hala’o iha Ministériu Komérsiu Repúblika Indonézia. Serimónia abertura ne’e prezide hosi Vise-Ministra Komérsiu indonézia nian, Dyah Roro Esti, iha ámbitu vizita ofisiál governante timoroan nian ba Jakarta. 
Forum Emprezariál ne’e halibur reprezentante governamentál no emprezariál sira, ho objetivu atu hametin lasus akonómikus bilaterais no esplora kolaborasaun iha setór estratéjiku sira hanesan komérsiu, investimentu no dezenvolvimentu ba empreza mikro, ki’ik no médiu sira. Iha ninia diskursu, Vise-Ministra Dyah Roro Esti destaka katak “Timor-Leste la’ós de’it hanesan destinu ba esportasaun, maibé mós parseiru estratéjiku ida ba Indonézia iha rejiaun ASEAN”. Nia mós subliña katak troka komersiál entre país rua ne’e hatudu ona tendénsia kreximentu iha tinan lima ikus ne’e, ne’ebé domina hosi esportasoins hosi setór sira seluk aleinde petróleu no gás. 
Durante Forum ne’e, hala’o sorumutu bilaterál ida entre Ministru Nino Pereira no Vise-Ministra Dyah Roro Esti, iha ne’ebé ko’alia kona-ba kestoins prioritárias iha ajenda ekonómika bilaterál, ne’ebé inklui preparasaun Memorandu Entendimentu ida kona-ba Kooperasaun Téknika iha Setór Komérsiu, adezaun plena Timor-Leste ba ASEAN no dezafius ne’ebé afeta esportasaun Indonézia ba merkadu Timor-Leste. 
Iha sorumutu ne’e, Vise-Ministra afirma fila-fali kompromisu Indonézia nian hodi fó apoiu ba prosesu adezaun Timor-Leste nu’udar Estadu-Membru ASEAN ba da-11. Nia mós informa katak, iha koordenasaun ho Ministériu Negósius Estranjeirus Indonéziu no ho apoiu hosi Ajénsia Kooperasaun Internasionál Japaun (JICA), dezenvolve hela programa formasaun ba períodu 2025–2026 ho objetivu atu hametin Timor-Leste nia preparasaun ba integrasaun plena iha ASEAN.
Vise-Ministra mós aproveita okaziaun ne’e hodi konvida formalmente Ministru Nino Pereira hodi partisipa iha edisaun tuirmai kona-ba Trade Expo Indonézia nian, ne’ebé sei hala’o hosi loron 15 to’o 19 fulan-outubru tinan 2025, iha Tangerang, Banten.
Iha sorumutu ne’e partisipa mós husi Embaixadór Timor-Leste iha Jakarta, Roberto Sarmento de Oliveira Soares, Diretór-Jerál Dezenvolvimentu Esportasaun Nasionál, Fajarini Puntodewi, Diretór Dezenvolvimentu Esportasaun Produtu Primáriu, Miftah Farid, no Diretór Negosiasaun Inter-rejionál no Organizasaun Internasionál, Natan Kambuno. 
