Iha loron 24 fulan-juñu tinan 2025, Governu, liuhusi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, asina akordu ho Uniaun Europeia ba implementasaun Programa Nutrisaun no Inkluzaun Sosiál ida. Serimónia ne’e hala’o iha salaun JL-Word, Dili, no hetan partisipasaun hosi reprezentante sira husi parseiru dezenvolvimentu no sosiedade sivíl. 

Durante serimónia ne’e, Vise-Primeiru-Ministru espresa katak hanesan “onra ida atu bele ko’alia iha serimónia ida-ne’e ne’ebé marka asinatura ba Programa Nutrisaun no Inkluzaun Sosiál, ho apoiu finanseiru husi Uniaun Europeia”, hodi konsidera katak akordu ida-ne’e “aborda pilár fundamentál sira ba dezenvolvimentu umanu”. Mariano Assanami Sabino defende nesesidade urjente hodi “hametin protesaun sosiál no nutrisaun iha Timor-Leste”, no subliña katak área hirak-ne’e “iha tebes interligasaun no tenke aborda ho forma integrada”. 

Tuir Vise-Primeiru-Ministru, “esensiál maka kombina edukasaun nutrisionál, asesu ba ai-han oioin no servisu saúde nian hodi apoia labarik sira-nia dezenvolvimentu”. Nia hatutan tan katak “esforsu sira tenke fó prioridade ba komunidade sira ne’ebé vulneravel no remota liu, hodi utiliza abordajen sira ne’ebé bazeia ba dadus no sistema prestasaun servisu lokál sira”. Ba ida-ne’e, nia defende nesesidade ba “polítika koordenada, finansiamentu adekuadu no kolaborasaun inter-setoriál, ne’ebé aliña ho prioridade sira Governu Konstitusionál IX nian”. 

Mariano Assanami Sabino subliña mós katak “investe iha protesaun sosiál no nutrisaun la’ós kustu ida, maibé baze ba dezenvolvimentu kapitál umanu, hodi aumenta produtividade ba tempu naruk no ba reziliénsia nasionál”. No nia fó ezemplu ida: “Labarik ida-idak ne’ebé hetan asesu ba hahán nutritivu, inan ida-idak ne’ebé hetan apoiu ba maternidade, no komunidade ida-idak ne’ebé hetan asesu ba bee-moos lori ita besik liután ba Timor-Leste ida ne’ebé forte no saudavel liután”.

Governante aproveita okaziaun ne’e hodi lansa apelu koletivu ida: “Ha’u konvida ema hotu atu reafirma ita-nia kompromisu hodi proteje sira ne’ebé vulneravel liu, hadi’a nutrisaun no garante katak laiha ema ida mak hela iha kotuk, ho serbisu hamutuk ho Governu, sosiedade sivíl, parseiru dezenvolvimentu no sidadaun sira.”

Programa foun ne’e, finansia hosi Uniaun Europeia ho montante euro millaun 12 (besik dolar amerikanu millaun 14), prevee atu benefisia diretamente ema besik rihun 150 iha munisípiu ualu: Aileu, Ainaro, Kovalima, Dili, Ermera, Lautein, Likisá no Vikeke. Ho apoiu husi Programa Alimentár Mundiál (PAM) no UNICEF iha ninia ezekusaun, inisiativa ne’e foka-liu ba inan isin-rua no inan-fó-susu, labarik sira tinan lima mai kraik, labarik sira ho idade eskolár, ho objetivu atu hadi’a asesu ai-han nutritivu, kuidadu saúde ho kualidade no servisu ba protesaun sosiál ne’ebé efikás. Ninia implementasaun sei foka-liu ba esforsu hodi hametin kapasidade rekursus umanus, apoiu instituisaun nasionál sira no mobilizasaun ativa ba organizasaun sosiedade sivíl sira.

 “Ho tau hamutuk esforsu husi parseiru hotu-hotu, ita bele harii sosiedade ida ne’ebé saudavel liu, justu liu, no garante futuru ida ne’ebé nabilan liu ba povu Timor-Leste”, hakotu Vise-Primeiru-Ministru.