Governu Konstitusionál IX simu ho ksolok publikasaun Índise Pás Globál 2025 nian, ne’ebé fó-sai iha loron 18 fulan-juñu tinan 2025 hosi Institutu ba Ekonomia no Pás (Institute for Economics & Peace), ne’ebé rekoñese Timor-Leste nu’udar país ho “Nivel Aas ba Pás”. Timor-Leste okupa pozisaun da-44 hosi Estadu no territóriu 163 ne’ebé hetan avaliasaun, rejista sa’e pozisaun lima kompara ho relatóriu anteriór, ho pontuasaun jerál 1,758. 

Relatóriu, ne’ebé sukat nivel sira seguransa sosiál nian, konflitus internus no esternus, no grau militarizasaun iha nasaun ida-idak, iha sorin seluk, hatudu deteriorasaun foun ida tan ba dame iha nivel mundiál – ba dala neen tuituir malu – maibé, iha sorin seluik, Timor-Leste konsolida ninia pozisaun entre país sira ne’ebé pasífiku liu iha rejiaun Ázia-Pasífiku, hodi okupa pozisaun da-10 entre nasaun 19 iha rejiaun ne’e. Melloramentu ne’e hetan, liuliu, tanba nivel konflitu sira sei ki’ik nafatin no tanba indikadór pozitivu sira iha área Seguransa no Protesaun ba Sosiedade. 

Bazeia ba indikadór kualitativu no kuantitativu 23, Índise Pás Globál avalia kondisaun pás iha área fundamentál tolu: nivel Seguransa no Protesaun ba Sosiedade, estensaun Konflitu Nasionál no Internasionál ne’ebé la’o hela no grau Militarizasaun, hodi fornese análize abranjente ida kona-ba tendénsia dame globál no ninia valór ekonómiku.

Governu simu ho ksolok evolusaun pozitiva ida-ne’e, ne’ebé reflete kompromisu nasionál hodi promove estabilidade, hametin instituisaun demokrátika sira no kontinua investimentu iha dezenvolvimentu sustentável.