Vise-Primeiru-Ministru, Francisco Kalbuadi Lay, nu’udar Ministru Koordenadór Asuntus Ekonómikus, no Ministra Solidariedade Sosiál no Inkluzaun, Verónica das Dores, partisipa iha Sorumutu Ministrus Traballu no Asuntus Sosiais husi Comunidade dos Países de Língua Portuguesa (CPLP) ba da-16, ne’ebé hala’o iha loron 18 fulan-juñu tinan 2025, iha sede organizasaun nian, iha Lizboa, ho lema “ Dignidade Laborál no Empregabilidade Joven”. 

Sorumutu ne’e halibur reprezentantes hosi Estadu-Membru sia CPLP nian, Organizasaun Internasionál Traballu (ILO, akrónimu iha lian Inglés) no Asosiasaun Internasionál Seguransa Sosiál (AISS), ho objetivu atu reforsa kooperasaun entre país língua portugeza sira iha área traballu, empregu no protesaun sosiál. 

Iha nia diskursu, Ministra Verónica das Dores destaka katak “serbisu, ho kondisaun sira dignidade no liberdade nian, sei sai nafatin fatór koezaun sosiál, dignidade no dezenvolvimentu nian”, hodi reafirma kompromisu hosi Governu Konstitusionál IX atu “hametin implementasaun medida sira apoiu sosiál nian ba joven, feto, ema ho defisiénsia no ema sira ne’ebé iha situasaun eskluzaun sosiál, ho objetivu atu integra mós sira iha sosiedade,  no mós iha merkadu traballu nian”. 

Ministra ko’alia mós avansu sira iha sistema seguransa sosiál Timor-Leste nian, ne’ebé “inklui rejime kontributivu no la’ós kontributivu”, hodi salienta katak “iha rejime kontributivu, [Timor-Leste] oras ne’e daudaun iha traballadór rejistadu rihun 171”, ho dadus ne’ebé hatudu “katak rejime repartisaun nian tinan-tinan kontinua kria exedente”, ho “rezerva akumuladu hamutuk (…) dolar amerikanu millaun 234”. 

Ministra Verónica das Dores asume mós determinasaun Ezekutivu nian atu “halo barak liután no di’ak liután”, atu “kontinua habelar ita-nia sistema kobertura nian ba ema barak liután, liuliu foin-sa’e sira ne’ebé serbisu iha setór informál”, no mós atu “aumenta situasaun sira ne’ebé kobre no nune’e kontinua kontribui ba promosaun Serbisu ne’ebé Dignu ba ema-hotu!”

Sorumutu ne’e permite halo avaliasaun ba ezekusaun Planu Estratéjiku Kooperasaun ba Traballu no Asuntus Sosiais CPLP nian (PECTAS 2024-2030), análize no aprovasaun rejimentu internu foun no adopta Deklarasaun Finál hosi sorumutu, ne’ebé reafirma “kompromisu metin hodi halakon traballu infantíl” no apela ba “ratifikasaun plena ho lalais” “Konvensaun multilaterál Seguransa Sosiál CPLP nian”.

Iha ámbitu ida-ne’e, Ministra Solidariedade Sosiál no Inkluzaun apela ba nia omólogu sira atu Estadu-membru hotu-hotu bele “konklui prosedimentu sira ne’ebé presiza atu nune’e Konvensaun (…) ne’e bele tama iha vigór”, tanba “ne’e mós dalan ida atu proteje ita-nia traballadór sira, liuliu foin-sa’e sira, iha ita-nia Komunidade nia espasu!”.

Iha loron hirak molok sesaun ministeriál, delegasaun nasionál partisipa mós iha sorumutu téknika Pontu Fokál sira CPLP nian kona-ba Kombate Traballu Infantíl, Inspesaun Traballu no Asuntus Sosiais, hodi kontribui ba preparasaun dokumentu sira ne’ebé aprova ona iha sesaun ministeriál ne’e.