……………………………………………………………………………………………………………
Komunikadu Imprensa
Loron 20, fulan-juñu, tinan 2025
Governu Felisita Primeiru-Ministru Kay Rala Xanana Gusmão ba ninia Aniversáriu ba da-79 no Fó omenajen ba ninia Lideransa iha Servisu ba País ne’e
Governu Konstitusionál IX ho laran-tomak felisita Primeiru-Ministru, Kay Rala Xanana Gusmão, iha okaziaun ba ninia aniversáriu ba da-79, ne’ebé selebra ohin, iha loron 20 fulan-juñu tinan 2025.
Hodi marka data simbóliku ida-ne’e, Ezekutivu ne’e rekoñese perkursu moris figura esensiál ida iha istória nasionál, ne’ebé ninia lideransa kontinua orienta Timor-Leste ho determinasaun, vizaun estratéjika no kompromisu kle’an ba moris-di’ak timoroan tomak nian.
Dezde simu pose nu’udar Primeiru-Ministru ba Governu Konstitusionál IX nian iha loron 1 fulan-jullu tinan 2023, Kay Rala Xanana lori ona nasaun ne’e ba etapa foun reformas estruturais no afirmasaun internasionál. Iha ninia lideransa, Governu foka filafali ba governasaun di’ak, Estadu direitu demokrátiku, no investimentu iha área estratéjiku sira ba dezenvolvimentu nasionál.
Iha nivel internu, Governu implementa ona programa reforma boot ida iha setór finansas públikas, justisa, petrolíferu no rekursus minerais, funsaun públika no mós administrasaun sentrál no lokál, ho foku ba efisiénsia, transparénsia no responsabilizasaun.
Iha setór infraestrutura, Governu Konstitusionál IX kontinua investimentu públiku estruturante, ho planu ida atu halo reabilitasaun no konstrusaun ba estrada, normaliza mota sira, no hadi’a abastesimentu bee no saneamentu, no habelar rede elétrika. Inisiativa sira-ne’e ho objetivu atu hadi’a populasaun sira-nia kualidade moris, hamenus dezigualdade rejionál no haburas atividade ekonómika lokál.
Diversifikasaun ekonómika mós hanesan prioridade ida, ho asoins konkretas iha setór oioin, liuliu iha agrikultura, turizmu no dezenvolvimentu polítika ekonomia azúl nian. Hala’o hela intervensaun sira hodi hadi’a produtividade agríkola, habelar konektividade dijitál, fasilita investimentu privadu no apoia setór emprezariál nasionál, ho objetivu atu kria empregu no promove kreximentu ekonómiku ida ne’ebé sustentável no inkluzivu liu.
Iha nivel internasionál, Governu ne’ebé lidera hosi Kay Rala Xanana Gusmão konkretiza ona integrasaun Timor-Leste nian iha Organizasaun Mundiál Komérsiu (OMC, sigla iha lian portugés), hodi tau país ne’e nu’udar parseiru ekonómiku ida ne’ebé nakloke no komprometidu ho regras multilaterais. Iha ámbitu ASEAN nian, Ezekutivu ne’e kumpre ho forma konsistente ba rekizitu sira ne’ebé estabelese iha Roteiru ba Adezaun Plena, ne’ebé prevee entrada ofisiál país nian ba organizasaun rejionál ne’e iha fulan-outubru tinan ida-ne’e, iha Simeira ASEAN ba dala 47.
Progresu mós hala’o daudaun iha negosiasaun ho parseiru internasionál sira hodi implementa projetu Greater Sunrise, ho objetivu atu asegura katak rekursus petrolíferus fó benefísiu diretamente ba país no reforsa ninia soberania ekonómika.
Lori membru Governu tomak nia naran, Ministru Prezidénsia Konsellu Ministrus no Portavós Governu, Agio Pereira, deklara katak “iha loron espesiál ida-ne’e, ami fó omenajen ba perkursu no lideransa Primeiru-Ministru Kay Rala Xanana Gusmão nian, ne’ebé kontinua inspira nasaun ne’e ho nia ezemplu korajen, dedikasaun no vizaun. Ho ninia orientasaun, Governu Konstitusionál IX hala’o ona reformas estruturais no ajenda dezenvolvimentu nian ida ne’ebé ambisiozu, ne’ebé sempre foka liu povu Timor-Leste nia moris-di’ak no afirmasaun soberana Timor-Leste nian iha mundu.”
Iha okaziaun ida-ne’e, Governu Konstituisaun IX hafoun ninia kompromisu ba vizaun estratéjika Primeiru-Ministru nian no reafirma ninia determinasaun, iha ninia lideransa atu kontinua serbisu maka’as hodi harii país ida ne’ebé justu, reziliente no prósperu liu ba timoroan tomak.
Parabéns, Señór Primeiru-Ministru!