Tuir Deklarasaun Prezidénsia Simeira Asosiasaun Nasoins Sudeste Aziátiku  (ASEAN) nian   ba dala 46, ne’ebé adota iha Kuala Lumpur iha loron 26 fulan-maiu tinan 2025, no Rezolusaun Governu ne’ebé aprova hosi Konsellu Ministrus iha reuniaun iha loron 29 fulan-maiu, ne’ebé estabelese grupu traballu interministeriál ida ne’ebé iha responsabilidade atu «konklui prosedimentu formál sira ne’ebé nesesáriu, no mós aselera negosiasaun sira kona-ba akordu ekonómiku prinsipál ne’ebé nesesáriu ba prosesu adezaun plena Timor-Leste ba organizasaun ne’e», Governu hala’o Sorumutu Koordenasaun Interministeriál dahuluk iha loron 16 fulan-juñu. Reuniaun ne’e prezide husi Primeiru-Ministru, Kay Rala Xanana Gusmão, no hala’o iha Salaun Nobre Ministériu Negósius Estranjeirus no Kooperasaun nian. 

Ajenda reuniaun ne’e inklui análize desizaun sira hosi Simeira ba dala 46, pontu situasaun kona-ba Tratadu Zona Livre Armas Nukleares Sudeste Aziátiku nian (SEANWFZ), avaliasaun progresu iha ezekusaun Roteiru ba Adezaun Plena, definisaun prioridade negosiasaun sira no ekipa prinsipál negosiasaun nian, aprezentasaun Vizaun Komunidade ASEAN 2045 no  nesesidade sira kapasitasaun nian, no mós apresiasaun kalendáriu ba pasu sira tuirmai, estabelesimentu pontu fokál ministeriál sira iha órgaun setoriál sira ASEAN nian, dotasaun orsamentu globál Governu nian ba prosesu no preparasaun administrativu no lojístiku sira ba Simeira ASEAN ba dala 47, ne’ebé marka ona ba fulan-outubru. 

Ho inisiativa ida-ne’e, Governu reafirma nia kompromisu hodi kompleta, iha prazu ne’ebé konkorda ona, rekizitu hotu-hotu atu Timor-Leste bele sai Estadu-Membru ASEAN ba dala 11.