Jornada Orsamentál tinan 2026
Hanesan parte ida husi kalendáriu preparasaun Orsamentu Jerál Estadu ba tinan 2026, ne’ebé fahe tiha ona ba entidade públika hotu-hotu, iha loron 13 fulan-juñu tinan 2025 Ministériu Finansas organiza Jornada Orsamentál tinan 2026, ho lema “Otimiza Rezultadu sira ho Despeza Realístiku sira”. Reuniaun ida-ne’e, hala’o iha Auditóriu Ministériu Finansas, ho objetivu atu permite Governu analiza prioridade nasionál sira no define senáriu tetu fiskál ba ezersísiu tinan 2026 nian.
Programa ne’e hahú iha tuku 8:30 dadeer ho rejistu husi partisipante sira, tuir-fali iha tuku 9 dadeer ho toka Inu Nasionál Timor-Leste. Iha tuku 9:10, Ministra Finansas sei simu sira ne'ebé marka prezensa, antes ho diskursu abertura badak hosi Primeiru-Ministru.
Hahú iha tuku 9:40, sei iha aprezentasaun oin-oin hosi Ministériu Finansas, inklui panorámika ida kona-ba kontestu makroekonómiku no sosiál, análize dezempeñu reseita nian sira iha tinan hirak liubá, no panorama fiskál. Aprezentasaun sira-ne'e sei kontinua to'o tuku 11:30.
Tuirmai Intervensaun espesífika sira kona-ba dezempeñu no dezafiu prinsipál sira ne’ebé hasoru hosi setór finanseiru no privadu sira, ho partisipasaun hosi Banku Nasionál Komérsiu Timor-Leste (BNCTL, sigla iha lian portugés) no Kámara Komérsiu no Indústria Timor-Leste (CCITL, sigla iha lian portugés).
Hafoin deskansa almosu nian, entre tuku 12:30 no tuku 14:00, sesaun hahú fali ho aprezentasaun foun tolu hosi Ministériu Finansas, ne'ebé foka liu ba dezempeñu hosi despeza sira iha tinan hirak liubá, despeza obrigatória sira no senáriu fiskál indikativu ba tinan 2026.
Husi tuku 3:00 to’o tuku 5:15 lokraik, sei iha espasu diskusaun entre partisipante sira. Sesaun jornada orsamentál ne’e sei remata iha tuku 5:30 lokraik.
