Sekretáriu Estadu Defeza Timor-Leste, Júlio Tomás Pinto, ho Sekretáriu Estadu Defeza Nasionál ba Asuntu Tasi Portugal, Marcos Perestrello, asina akordu ida kona-ba kooperasaun nian iha área Defeza entre Timor-Leste ho Portugal iha Pálasiu Governu, iha loron 19 fulan Novembru 2010 liu ba.

Atu realiza kooperasaun entre rai rua ne’e, Komando Falintil-Forsa Defeza Timor-Leste F-FDTL sei haruka sarjentu no ofisiál sira ba tuir treinamentu iha Portugal. Vizita Sekretáriu Estadu Defeza Nasionál ba Asuntu Tasi Portugal, Marcos Perestrello mai Timor-Leste hatudu imejen pozitivu mai Timor-Leste, tanba kumpri duni  sira ninia kompromisu atu ajuda Timor-Leste, hateten Júlio Tomás Pinto hafoin asina MoU ne’e.

Júlio Tomás Pinto ne’e haktuir liu tan katak akordu ne’e hanesan kontinuasaun hosi akordu ne’ebé Governu Timor-Leste asina tiha ona ho Portugal, iha tinan 2007 atu fó apoiu nafatin ba F-FDTL, apoiu nafatin planu forsa 2020, ne’ebé mak ita iha tiha ona, iha akordu nia laran koalia mós kona-ba formasaun ho apoiu seluk ne’ebé Portugal oferese mai F-FDTL iha futuru.

Asuntu ne’ebé mak importante mós iha akordu ne’e mak mekanismu oinsa Falintil Forsa Defeza Timor-Leste, F-FDTL bele tama iha kontijente Portugal nian iha forsa Operasaun ba Manutensaun Paz iha futuru.