Vise-Ministra Asuntus ASEAN no Reprezentante Timor-Leste ba Sorumutu Funsionárius Importantes (SOM Leader), Milena Rangel, lidera delegasaun Timor-Leste nian ne’ebé partisipa iha Sorumutu ASEAN Senior Officials’ Meeting (ASEAN SOM), ASEAN Plus Three Senior Officials’ Meeting (APT SOM) no East Asia Summit Senior Officials’ Meeting (EAS SOM) nian, ne’ebé hala’o entre loron 9 no 10 fulan-juñu, iha Penang, Malázia. 

Durante sorumutu sira-ne’e, diskute tema prinsipál sira ba integrasaun rejionál no hametin kooperasaun ho parseiru esternu sira, ho énfaze ba progresu iha prosesu adezaun plena Timor-Leste nian ba ASEAN, no mós fahe perspetiva sira kona-ba kestaun rejionál no globál sira ne’ebé sai interese komún. 

Durante ASEAN SOM, Vise-Ministra Milena Rangel hala’o enkontru bilaterál ho Reprezentante Austrália ba ASEAN, Michelle Chan. Reuniaun ne’e fó-dalan atu hametin relasaun bilaterál entre Timor-Leste no Austrália, ho objetivu atu hakle’an kooperasaun iha área polítika, ekonómika no dezenvolvimentu.

Timor-Leste nia prezensa iha sorumutu sira ne’e subliña kompromisu nasaun nian ba prosesu integrasaun iha ASEAN no nia partisipasaun ativa iha dinámika rejionál ba pás, seguransa no dezenvolvimentu sustentável.