Gabinete Vise-Ministru Asuntus Parlamentares, Adérito Hugo da Costa, ofisialmente lansa Podcast Asuntus Parlamentares ne’ebé foun, inisiativa ida ne’ebé ninia objetivu prinsipál mak atu hasa’e koñesimentu populasaun nian kona-ba lejizlasaun ne’ebé aprova ona husi Governu no Parlamentu Nasionál. Aleinde promove sidadania ida ne’ebé informadu liután, projetu ne’e hakarak hametin ligasaun entre sidadaun sira no instituisaun demokrátiku sira, hodi kontribui ba partisipasaun ida ne’ebé konxiente no ativa liután iha vida públika. Serimónia lansamentu ne’e hala’o iha loron 10 fulan-juñu tinan 2025, iha Palásiu Governu, no hetan partisipasaun hosi membrus Governu no Parlamentu Nasionál. 

Iha nia diskursu, Vise-Ministru Asuntus Parlamentares afirma katak “inisiativa ida-ne’e reforsa liután esforsu koletivu atu promove partisipasaun públiku nian ne’ebé ativu iha desizaun Estadu nian no polítika públika sira, hodi serbí ita-nia nasaun no ita-nia povu”. 

Prezidente Komisaun A Parlamentu Nasionál nian, ne’ebé responsavel ba Asuntu Konstitusionál no Justisa, deputadu Patrocínio Fernandes dos Reis, elojia projetu ne’e, konsidera katak “projetu ne’e furak” tanba “permite sidadaun barak liu atu partisipa iha prosesu dezenvolvimentu, liuliu hodi fó espasu ida ba troka ideia kona-ba polítika públika ne’ebé elabora hosi Governu no Parlamentu”. 

Podcast Asuntus Parlamentares ne’ebé promove hosi Gabinete Asuntus Parlamentares, ho intensaun atu sai plataforma asesivel no regulár ida hodi klarifika polítika públika no desizaun lejizlativa sira ne’ebé afeta diretamente populasaun nia moris loroloron. Liuhusi konversa sira ho deputadus, membrus governu, peritus no sidadaun sira, programa ne’e ho objetivu atu hakbesik instituisaun sira ba populasaun, hodi promove transparénsia, debate demokrátiku no literasia polítika. Podcast ne’e sei disponivel iha website no mídia sosiál Gabinete Vise-Ministru Asuntus Parlamentares nian.

Inisiativa ida-ne’e hanesan adisionál ba projetu komunikasaun institusionál sira seluk ne’ebé lansa hosi Governu Konstitusionál IX, hanesan programa Página do Governo, ne’ebé promove hosi Ministru Prezidénsia Konsellu Ministrus, ho objetivu atu hametin relasaun entre Ezekutivu no populasaun no haburas kanál diálogu ne’ebé besik liu, partisipativu liu no efikás liu. 

Iha lansamentu Podcast Asuntus Parlamentares ne’e hetan mós partisipasaun husi Sekretáriu Estadu Komunikasaun Sosiál, Expedito Dias Ximenes, deputadu António Verdial de Sousa, Duarte Nunes no Manuel Henrique Noronha, no mós Koordenadora Gabinete Asuntus Parlamentares nian. 

Ho inisiativa ida-ne’e, Governu reforsa ninia kompromisu atu moderniza komunikasaun institusionál no konsolida demokrasia partisipativa, atu nune’e bele garante katak sidadaun hotu-hotu iha asesu ba informasaun no bele kontribui ativamente ba dezenvolvimentu nasaun nian.