Nota Pezar ba Profesor Barbedo de Magalhães nia mate
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 29 fulan-maiu tinan 2025
Komunikadu Imprensa
Nota Pezar ba Profesor Barbedo de Magalhães nia mate
Ho laran triste tebes Governu Repúblika Demokrátika Timor-Leste simu notísia kona-ba profesór António Barbedo de Magalhães nia mate, ho idade 82, figura destakada ida iha ensinu superiór portugés no defensór ida ne’ebé la hatene kole ba kauza timorense durante períodu okupasaun indonézia.
Doutoradu iha Siénsias Aplikadas hosi Universidade Gand, iha Béljika, no Profesór Eméritu hosi Universidade do Porto, Barbedo de Magalhães iha ligasaun ho Timor-Leste dezde tinan 1974, tinan ne’ebé nia kumpre ninia servisu militár iha territóriu no iha ne’ebé nia koordena projetu ida ba reestruturasaun ensinu iha Timor ho objetivu atu hetan independénsia iha médiu prazu. Durante okupasaun Indonézia, nia dedika-an ba defeza autodeterminasaun povu timoroan nian, hodi promove koñesimentu kona-ba realidade timoroan iha komunidade akadémika nia leet no opiniaun públika internasionál.
Nu’udar membru Komisaun ba Direitus Povu Maubere, Asosiasaun Pás no Justisa ba Timor-Leste no Komisaun Organizadora kona-ba Jornadas Timór nian iha Universidade do Porto. Nia organiza konferénsias kona-ba Timór- Leste iha nasaun oioin no publika livru hitu, nune’e mós testu atus ba atus kona-ba istória polítika país nian.
Hanesan rekoñesimentu ba ninia asaun sira iha defeza direitus povu timoroan nian, nia hetan kondekorasaun iha tinan 2000 hosi Estadu Portugés ho Orden Infante D. Henrique no iha tinan 2012 hosi Estadu Timor-Leste ho Orden Timor-Leste.
Ministru Prezidénsia Konsellu Ministrus no Portavós Governu nian, Agio Pereira, salienta katak “Profesór Barbedo de Magalhães nu’udar lian ida ne’ebé la kole hodi defende Timor-Leste, aliadu ida ne’ebé firme iha tempu sira ne’ebé susar liu no divulgadór ida ne’ebé komprometidu ba ita-nia istória no ita-nia aspirasaun sira. Povu timoroan agradese nafatin ba ninia kompromisu, solidariedade no amizade.”
Governu Repúblika Demokrátika Timor-Leste hato’o sentidu kondolénsia ba família, belun no komunidade akadémika, ho respeitu kle’an ba legadu António Barbedo de Magalhães. Ninia memória sei moris nafatin iha ita- istória país nian no iha ema hotu nia fuan ne’ebé luta ba justisa no ba dignidade povu sira nian. REMATA
