Governu Repúblika Demokrátika Timor-Leste simu ho ksolok boot ba Deklarasaun husi Prezidente Asosiasaun Nasoins Sudeste Aziátiku (ASEAN), ne’ebé fó-sai iha Simeira ASEAN ba da-46, ne’ebé hala’o iha loron 26 no 27 fulan-maiu iha Kuala Lumpur, Malázia, ne’ebé konfirma desizaun koletiva husi Lider sira ASEAN nian hodi admite Timor-Leste hanesan Estadu-Membru ASEAN ba da-11, iha Simeira ASEAN ba da-47, ne’ebé ajenda ona ba fulan-outubru tinan 2025. 

Iha Deklarasaun ofisiál, lider sira ASEAN nian afirma:

124. “Ami deside, iha Simeira ida-ne’e, hodi admite Timor-Leste sai Membru ASEAN nian ba da-11, iha Simeira ASEAN ba da-47, ne’ebé sei hala’o iha fulan-outubru tinan 2025, no fó instrusaun ba ami-nia Ministrus no funsionárius Importantes atu kompleta prosedimentu formál sira ne’ebé nesesáriu no mós aselera negosiasoins kona-ba akordu ekonómiku prinsipál sira.”

125. “Ami fó fiar ba Konsellu Koordenadór ASEAN nian, ho apoiu hosi órgaun ministeriál setoriál hotu-hotu ne’ebé kompetente no Sekretaria ASEAN nian, ho knaar atu fó apoiu nesesáriu ba integrasaun Timor-Leste iha Komunidade ASEAN.” 

126. “Ami fó benvindu ba funsionamentu Unidade Timor-Leste hodi akompaña implementasaun Roteiru no koordena apoiu hosi Estadus-Membrus no parseiru esternu sira. Ami enkoraja ona parseiru esternu sira-ne’e atu kontinua fó apoiu ba Timor-Leste hodi kumpre kritériu sira ne’ebé estabelese ona.”

Desizaun istórika ida-ne’e nu’udar marku signifikativu ida ba Timor-Leste, hodi reflete parseria ne’ebé metin liután, konfiansa mútua no aspirasaun hamutuk ho Estadus-Membrus ASEAN nian, no mós progresu importante ne’ebé halo ona iha implementasaun Roteiru ba adezaun plena.

Governu Timor-Leste, ho laran-tomak hato’o agradesimentu ba Estadu-Membru sira-hotu ba sira-nia solidariedade no apoiu ne’ebé metin, no mós ba parseiru dezenvolvimentu sira ba sira-nia kompromisu kontínuu durante perkursu ida-ne’e. 

Timor-Leste preparadu atu asume ninia responsabilidade nu’udar membru plenu direitu ASEAN nian no hein atu kontribui maka’as ba Komunidade ASEAN ida ne’ebé unida, pasífika no reziliente.