Sesta-feira ohin, loron 23 fulan-maiu tinan 2025, tuku 8 kalan, sei tranzmite edisaun dalimak husi programa institusionál “Página do Governo”, inisiativa ida ne’ebé promove husi Ministru Prezidénsia Konsellu Ministrus no Portavós Governu, Agio Pereira, iha parseria ho Rádiu no Televizaun Timor-Leste (RTTL). Programa ne’e ho objetivu atu hametin transparénsia governativa no hakbesik Ezekutivu ba populasaun. Edisaun ohin marka prezensa husi Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino. 

Durante entrevista ne’ebé hala’o hosi Nélia Chaves, Vise-Primeiru-Ministru aprezenta ninia vizaun estratéjika ba artikulasaun polítikas sosiais, hodi subliña nesesidade ba reformas estruturais ne’ebé promove justisa, ekuidade no dignidade ba sidadaun hotu-hotu. “Foku prinsipál maka reforma polítikas sosiais”, “hodi ita bele hasa’e no dignifika sidadaun sira-nia moris, ho direitu tomak ne’ebé Konstituisaun garante”, nia hateten. Nia ko’alia-liu mós importánsia hosi koordenasaun interministeriál husi ministériu neen no instituisoins públikas oioin, atu nune’e bele garante katak “polítikas sosiais foka ba povu, ba famílias, no to’o ba ema hotu ho justu”.

Vise-Primeiru-Ministru salienta importánsia husi abordajen ida ne’ebé integrada no intersetoriál hodi hasoru dezafiu sira hanesan mal-nutrisaun krónika no labarik sira ne’ebé nia kreximentu tarde. Iha sentidu ida-ne’e, nia destaka Planu Asaun Nasionál Nutrisaun Multisetoriál ba Kombate Kra’es-badak (stunting) 2024-2030 – ne’ebé koñesidu hanesan PANKOS – ne’ebé aprova ona no iha faze implementasaun. “Kreximentu tarde maka perigu boot ida ba ita-nia nasaun”, nia alerta, hodi defende importánsia hosi asaun konjunta entre setór saúde, edukasaun, agrikultura, abastesimentu bee no protesaun sosiál. 

Iha área dezenvolvimentu rurál nian, Vise-Primeiru-Ministru defende transformasaun progresiva ida hosi áreas rurais sai área sira ne’ebé ekonómikamente produtivu, hodi destaka nesesidade atu “aproveita potensiál rai nian, potensiál bee nian no área oioin ne’ebé ita iha, hodi transforma sai rejioins ne’ebé produtivas, ne’ebé bele hasa’e rendimentu iha áreas rurais”. Vise-Primeiru-Ministru Mariano Assanami Sabino aprezenta mós hanesan prioridade maka, promosaun polítika uma dignu. Nia temi mós inisiativa oioin ne’ebé hala’o daudaun hodi hadi’a kondisaun sira abitasaun nian iha área rurál sira no definisaun ba tipolojias abitasaun ne’ebé adapta ho realidades sosiais no ekonómikas família timoroan sira-nian.

Programa “Página do Governo”, ho Ika Moniz nu’udar produtora ezekutiva no ho apoiu tékniku hosi ekipa mídia Gabinete Primeiru-Ministru nian, Prezidénsia Konsellu Ministrus no Gabinete Vise-Primeiru-Ministru nian.

Portavós Governu, Ministru Agio Pereira, reafirma katak “‘Página do Governo” nu’udar instrumentu importante ida hodi promove prestasaun kontas no diálogu entre Ezekutivu no sidadaun sira”.

Governu konvida sidadaun hotu-hotu atu akompaña ohin, loron 23 fulan-maiu tinan 2025, hahú hosi tuku 8:00 kalan, tranzmisaun ‘Página do Governo’ edisaun ida-ne’e nian liuhosi RTTL no iha redes sosiais, hodi kontribui ba sosiedade ida ne’ebé informada, partisipativa no komprometida liu ba dezenvolvimentu Timor-Leste nian.