Gabinete Fronteiras Terrestres no Marítimas (GFTM) Repúblika Demokrátika Timor-Leste nian hala’o Konferénsia Internasionál Dili ba Daruak kona-ba Direitu Marítimu, husi loron 15 to’o 16 fulan-maiu tinan 2025, iha Dili, kapitál país nian.

Ho tema “Hasoru dezafius: Direitu Marítimu no Rezolusaun Litíjius Marítimus”, konferénsia durante loron rua ne’e halibur juristas eminentes, funsionárius importantes governu nian, ema-estudiozu sira kona-ba direitu no reprezentantes husi instituisaun rejionál no internasionál sira hodi ezamina papél direitu internasionál nian – liuliu Konvensaun Nasoins Unidas nian kona-ba Direitu Marítimu (CNUDM/UNCLOS) – iha rezolusaun pasífika litíjius marítimus nian.

Konferénsia ne’e ofisialmente loke husi Sua Exelénsia Dr. José Ramos-Horta, Prezidente Repúblika Demokrátika Timor-Leste, ne’ebé iha ninia diskursu reafirma kompromisu nasaun nian ne’ebé dura ba Estadu direitu no kooperasaun multilaterál. Reflete kona-ba signifikadu husi sorumutu ne’e, Prezidente Ramos-Horta afirma: “Konferénsia ida-ne’e hanesan oportunidade ida atu esplora no selebra kooperasaun jurídika globál no ba Timor-Leste atu hatudu ita-nia kompromisu ba pás no Estadu direitu”.

Konferénsia ne’e sura ho diskursu abertura ida husi Sua Exelénsia juis Tomas Heidar, Prezidente Tribunál Internasionál Direitu Marítimu (ITLOS), ne’ebé define intensaun konferénsia ne’e ho aprezenta vizaun jerál ida ne’ebé konvinsente kona-ba prinsípius jurídikus ne’ebé sai hanesan baze ba Direitu Marítimu. Juis Heidar subliña papél fundamentál ITLOS nian iha rezolusaun ba disputa sira kona-ba fronteira tasi, iha tempu hanesan destaka Tribunál nia esforsu ohin loron nian hodi hasoru dezafiu globál sira ne’ebé mosu, hanesan impaktu husi alterasoins klimátikas no protesaun ba biodiversidade tasi nian.

Durante loron rua, konferénsia ne’e sura ho painél altu nivel no debates espesializadus ne’ebé lidera hosi espesialista koñesidu sira iha mundu no profisionál seniór sira iha área Direitu Marítimu. Deliberasaun sira ne’e organizadu ho tema prinsipál lima: Lisaun kona-ba Konsiliasaun Tasi Timor, Fortalesimentu Mekanizmu Jurídiku Internasionál, Abordajen Rejionál ba Rezolusaun Konflitu, Alterasaun Klimátika no Disputa Marítima, no mós Jestaun Sustentavel Rekursus nian.

Iha loron ikus, Sua Exelénsia Primeiru-Ministru Kay Rala Xanana Gusmão halo reflesaun kle’an ida kona-ba dezafiu no responsabilidade sira ne’ebé inerente ba ordenamentu jurídiku globál atuál. Hodi subliña Timor-Leste nia ligasaun metin ho oseanu, nia afirma katak “oseanu halibur ita”. Primeiru-Ministru Gusmão ko’alia ho laran-moos kona-ba limitasaun sira hosi sistema legál internasionál, hodi nota katak “Direitu internasionál hakerek hosi nasaun sira ne’ebé maka iha podér, ba sira-nia benefísiu, no nasaun sira ne’ebé vulneravel maka sofre beibeik.”   Maski nune’e, Primeiru-Ministru Gusmão mós rekoñese relevánsia ne’ebé dura husi kuadru internasionál ne’ebé eziste, hodi hateten katak “ida-ne’e maka sistema ne’ebé ita iha no iha ne’ebé jere relasaun internasionál sira, nune’e nu’udar ita-nia devér hodi halo esforsu hotu atu harii filafali konfiansa no harii lei internasionál ida ne’ebé di’ak liu”.

Entre partisipante sira ne’e inklui reprezentante nivel altu hosi rejiaun Pasífiku, paízes ASEAN, grupu g7+ hosi Estadu frajil sira, Komunidade País Lian Portugés (CPLP, sigla iha lian portugés) no nasaun sira seluk. Enkontru ne’e fornese plataforma ida ba diálogu konstrutivu, troka koñesimentu no avansu kuadrus jurídikus ne’ebé apoia kooperasaun no rezolusaun pasífika kona-ba disputa sira iha área tasi.

Realizasaun Konferénsia Internasionál Dili ba daruak ida-ne’e koinside ho aniversáriu ba da-10 estabelesimentu LMBO nian, ne’ebé subliña kompromisu permanente Timor-Leste nian ba direitu internasionál, rezolusaun pasífika ba litíjius no kooperasaun rejionál.

Durante dékada ikus, LMBO dezempeña papél fundamentál ida iha esforsu Timor-Leste nian hodi define no salvaguarda ninia fronteira tasi, tuir lei internasionál, iha tempu hanesan hodi kontribui ba promosaun orden ida bazeia ba regras iha rejiaun ne’e.

Gabinete ne’e hato’o ninia agradesimentu ua’in ba oradór no partisipante sira hotu ba sira-nia kontribuisaun valioza ba konferénsia ne’e no reafirma ninia kompromisu ba diálogu pasífiku, integridade direitu internasionál no governasaun kooperativa ba espasus marítimus.