Sekretáriu Estadu Formasaun Profisionál no Empregu, Rogério Araújo Mendonça, ohin dadeer ida-ne’e, loron 22 fulan-maiu tinan 2025, partisipa iha gravasaun epizódiu ba da-10 hosi Programa “Página do Governo”, ne’ebé sei transmite iha tempu badak hosi Rádiu no Televizaun Timor-Leste (RTTL) no divulga iha redes sosiais. 
Durante entrevista ne’e, Sekretáriu Estadu aborda prioridade no área intervensaun prinsipál sira husi ninia gabinete, iha ámbitu estratéjia Governu Konstitusionál IX nian ba dezenvolvimentu rekursus umanus no promosaun empregu iha Timor-Leste. Diskute mós esforsu sira ne’ebé la’o hela atu hametin formasaun téknika no profisionál, hadi’a ligasaun ho merkadu traballu no habelar oportunidade ba joven timoroan sira, inklui liuhosi programa mobilidade laborál no parseria ho entidade nasionál no internasionál sira.
“Página do Governo” ne’e promove husi Ministru Prezidénsia Konsellu Ministrus no Portavós Governu, Agio Pereira, iha parseria ho RTTL. Programa ne’e konta ho Nélia Chaves nu’udar aprezentadora, Ika Moniz nu’udar produtora ezekutiva, no apoiu tékniku husi ekipa mídia sira Gabinete Primeiru-Ministru nian, Gabinete Portavós Governu, no hosi Gabinete membru Governu nian ne’ebé hetan entrevista. Inisiativa ida-ne’e ho objetivu atu hametin transparénsia no prosimidade entre Ezekutivu no sidadaun sira, hodi permite ba populasaun atu akompaña, ho dalan asesivel no informadu, asaun prinsipál no polítika públika sira ne’ebé la’o hela. 
Iha sesta-feira semana ne’e, loron 23 fulan-maiu, tuku 8:00 kalan, sei transmite epizódiu ho Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, iha edisaun ida ne’ebé dedika ba dezenvolvimentu sosiál no rurál, ho foku ba promosaun polítika integrada sira ba moris-di’ak populasaun nian. Governu konvida sidadaun hotu-hotu atu asiste transmisaun ida-ne’e, ne’ebé sei fó-sai iha RTTL no iha rede sosiál sira. 
Atu haree programa anteriór sira hosi Pájina Governu nian ne’ebé fó-sai ona ho Ministru Negósius Estranjeirus no Kooperasaun hanehan iha-ne’e, ho Ministru Administrasaun Estatál hanehan iha-ne’e, ho Ministru Obras Públikas hanehan iha-ne’e, no ho Ministru Planeamentu no Investimentu Estratéjiku hanehan iha-ne’e. 