Semináriu Rejionál Pasífiku kona-ba Deskolonizasaun hahú ona iha kuarta-feira, loron 21 fulan-maiu tinan 2025, iha Dili, ne’ebé realiza husi Komité Espesiál Nasoins Unidas kona-ba Deskolonizasaun (C-24), iha parseria ho Governu Timor-Leste, ho tema “Dalan ba futuru ida ne’ebé sustentavel – promove dezenvolvimentu sosioekonómiku no kulturál iha Territóriu sira ne’ebé La’ós Autónomu”.

Semináriu, ne’ebé hala’o to’o loron 23 fulan-maiu ne’e, halibur reprezentantes husi Estadus-Membrus, Territóriu sira ne’ebé La’ós Autónomu, administrante potensiál, ajénsia espesializada husi Nasoins Unidas, organizasaun rejionál no peritu sira, sura ho partisipante kuaze 100 ne’ebé mai husi país besik 50. Objetivu mak atu rekolle kontributus kona-ba polítikas no meius prátikus ne’ebé bele aselera prosesu deskolonizasaun no reforsa dezenvolvimentu polítiku, ekonómiku, sosiál no kulturál iha territóriu sira ne’ebé sei iha administrasaun esterna nia okos.

Sesaun ba abertura ne’e prezide husi Prezidente Repúblika, José Ramos-Horta, ne’ebé destaka importánsia husi semináriu ne’e hanesan plataforma hodi hafoun kompromisu internasionál ba direitu autodeterminasaun. “Timor-Leste fiar metin katak prosesu deskolonizasaun seidauk hotu bainhira seidauk rona, respeita no implementa povu sira ne’ebé laran-maus sira-nia vontade livre. Defeza husi prinsípiu sira-ne’e la’ós de’it devér istóriku ida, maibé kontribuisaun vitál ida ba konstrusaun sistema internasionál ida-ne’ebé justu, inkluzivu no respeitadór liu”, afirma Prezidente Repúblika.

Xefe Estadu mós defende katak “esperiénsia Timor-Leste nian hatudu katak pás ne’ebé dura mosu mai husi respeitu ba povu nia vontade no hametin iha prátika liuhosi justisa sosiál, oportunidade ekonómika no liberdade kulturál”.

Ministru Negósius Estranjeirus no Kooperasaun, Bendito dos Santos Freitas, reafirma kompromisu Timor-Leste nian ba dezenvolvimentu sustentavel no respeitu ba povu nia identidade kulturál. “Ami-nia independénsia, alkansa ona iha tinan 2002, la’ós de’it marku polítiku ida – maibé hanesan sasin husi espíritu reziliente ami-nia povu nian no sira-nia vontade ne’ebé la nakdoko hodi duni-tuir liberdade no dignidade. Husi ne’ebá, ami mantein kompromisu atu harii nasaun ida ne’ebé fó onra ba ninia istória no kaer promesa futuru nian”, deklara Ministru Bendito Freitas.

Governante ne’e konklui nia diskursu hodi hato’o ninia dezeju katak “sorumutu ida-ne’e la’ós sai de’it diálogu ida. Ida-ne’e sai hanesan pontu virajen ida—momentu ida ne’ebé ita-nia kolaborasaun sai baze ba futuru ida ne’ebé sustentável no inkluzivu. Futuru ida ne’ebé fó onra ba ita-nia pasadu, hariku ita-nia prezente no asegura futuru ida ne’ebé di’ak liu ba jerasaun sira tuirmai”.

Moderadora husi sorumutu ne’e maka, Menissa Rambally, Reprezentante Permanente husi Santa Lúcia ba Nasoins Unidas no Prezidente Komité Espesiál, lidera traballu sesaun dahuluk nian, ne’ebé inklui intervensaun husi altu nivel no aprezentasaun estratéjias no prátika di’ak sira iha apoiu ba Territóriu sira ne’ebé La’ós Autónomu.

Ajenda husi semináriu ne’e prevee análize papél C-24 nian iha promosaun dezenvolvimentu sosioekonómiku no kulturál, avaliasaun ba perspetiva rejionál no globál kona-ba potensiais administrantes no territórius, nune’e mós kontributu Nasoins Unidas nian ba kriasaun solusaun prátika no alkansavel sira. Debate ne’e mós sei foka liu ba fahe esperiénsias deskolonizasaun nian, hanesan Timor-Leste, ne’ebé husi territóriu la’ós autónomu ba membru ativu Komité nian, hodi mantein nia lian solidariedade ho povu sira seluk ne’ebé iha situasaun sira ne’ebé hanesan.

Semináriu ne’e nia konkluzaun sai hanesan baze hodi halo rekomendasaun atu aprezenta ba Asembleia Jerál ONU iha ámbitu Dékada Internasionál Dahaat ba Halakon Kolonializmu (2021-2030), ne’ebé proklama husi Rezolusaun 75/123, ho objetivu atu hametin kooperasaun internasionál no garante katak povu sira-nia direitu ba Territóriu ne’ebé La’ós Autónomu hetan respeitu tomak.