……………………………………………………………………………………………………………
Komunikadu Imprensa
Sorumutu Konsellu Ministrus nian iha loron 14 fulan-maiu tinan 2025
Konsellu Ministrus hala’o sorumutu iha Palásiu Governu, Dili, no analiza ona aprezentasaun introdutória ida ne’ebé dirije husi Primeiru-Ministru, Kay Rala Xanana Gusmão, kona-ba Polítika no Planu Asaun Ekonomia Azúl – Promove Ekonomia Tasi ida ne’ebé Reziliente no sustentavel iha Timor-Leste (2025-2030), no mós rejime jurídiku prioritáriu sira ne’ebé sei dezenvolve iha ámbitu ninia implementasaun.
Polítika ida-ne’e hakarak atu promove paradigma foun dezenvolvimentu ekonómiku nian, bazeia ba utilizasaun rekursus tasi ne’ebé sustentável, nune’e mós kontribui hodi hadi’a kondisaun moris populasaun sira-nian no prezerva ekosistema sira. Bazeia ba polítikas no asoins integradas lubun ida, ne’ebé foka liu ba tasi, ho objetivu atu apoia dezenvolvimentu ekonómiku no sosiál país nian, bazeia ba prátika ambientál ne’ebé di’ak, ho forma diversifikada, sustentavel no inkluziva, ne’ebé garante ekilíbriu ba tempu naruk ekosistemas no rekursus tasi nian.
Iha ámbitu husi ninia elaborasaun, sei opromove prosesu konsulta públika ida ne’ebé luan, ne’ebé sei inklui ho munisípiu sira ne’ebé iha tasi, organizasaun naun-governamentais no parseirus dezenvolvimentu, ho objetivu atu rekolle kontributu no garante envolvimentu husi setór hotu-hotu sosiedade nian.
****
Ikusliu, Konsellu Ministrus aprova ona projetu Dekretu Governu, ne’ebé aprezenta hosi Ministru Transportes no Komunikasoins, Miguel Marques Gonçalves Manetelu, ne’ebé revoga Dekretu Governu n. 25/2021, loron 10 fulan-novembru, no halakon Unidade Misaun ba Jestaun Integrada Projetu Internasionál Aeroporto Internacional Presidente Nicolau Lobato (UMGIP-akrónimu iha lian portugés). Unidade ne’e, kria tuir akordu finansiamentu ho Banku Aziátiku Dezenvolvimentu, nunka instala ka hala’o atividade ruma. Ninia estinsaun ne’e hanesan rezultadu aprovasaun, iha loron 7 fulan-maiu tinan 2025, tuir konseitu foun ida ba projetu aeroportu nian no nesesidade hodi garante jestaun inisiativa ida ne’ebé lais, efetivu no efisiente liu. REMATA