Governu Timor-Leste Hato'o Parabéns ba Sua Santidade Papa Leão XIV
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 9 fulan-maiu tinan 2025
Komunikadu Imprensa
Governu Timor-Leste Felisita Sua Santidade Papa Leão XIV
Governu Timor-Leste, lori povu Timor nia naran, ho laran-tomak hato’o parabéns ba Sua Santidade Papa Leão XIV, ne’ebé eleitu iha loron 8 fulan-maiu 2025 nu’udar Sumu Pontífise Igreja Katólika nian ba dala 267.
Moris iha Chicago, Estadus Unidus Amérika, iha tinan 1955, Robert Francis Prevost hanesan Papa norte-amerikanu dahuluk no membru dahuluk hosi Orden Saun Agostinho nian ne'ebé simu knaar nu’udar Papa. Ho karreira ne’ebé marka ho tinan balun misaun pastorál nian iha Peru, iha-ne’ebé nia serbí nu’udar Bispu Chiclayo no hetan nasionalidade peruana, Papa Leão XIV hetan rekoñesimentu luan tanba ninia kompromisu ba justisa sosiál no inkluzaun ba sira ne’ebé vulneravel liu.
Timor-Leste, nu’udar nasaun fiar-na’in ne’ebé nia abut metin iha tradisaun katólika, hanoin hikas ho emosaun vizita pastorál Papa Francisco nian iha fulan-setembru 2024. Santu Padre nia prezensa nu’udar momentu markante ida ba renovasaun espirituál no hametin lasu istóriku entre povu timoroan no Santa Sé, lori mensajen esperansa, unidade no pás, ho énfaze espesiál ba knaar juventude nian no importánsia atu prezerva valór kulturál no espirituál povu timoroan nian.
Vizita Saun João Paulo II nian iha tinan 1989, tempu ida ne’ebé difisil tebes iha istória nasionál, ne’ebé lori ánimu no korajen ba povu timoroan, ne’ebé ema hotu sei hanoin-hetan nafatin.
Timor-Leste mós iha esperansa atu Sua Santidade Papa Leão XIV mós bele vizita ami-nia rain no asiste, ho matan rasik, fiar no lasu ne’ebé metin ne’ebé halibur povu timoroan ho Igreja Katólika.
Durante tinan barak okupasaun nian, Igreja Katólika hala’o knaar esensiál hodi fó apoiu ba povu timoroan, sai hanesan mahon iha-ne’ebé ema barak hetan protesaun, forsa espirituál no korajen atu reziste.
Ministru Prezidénsia Konsellu Ministrus no Portavós Governu nian, Agio Pereira, afirma katak “Timor-Leste oras ne’e hanoin hikas ezemplu inspiradór Papa Francisco nian, ne’ebé marka nia pontifikadu ho lideransa haraik-an, besik ba povu no firme iha defeza justisa sosiál nian. Ami fiar ho laran-tomak katak, Papa Leão XIV bele kontinua legadu hakbesik-an ba kiak sira, promove dame no diálogu entre relijiaun sira.” REMATA
