Ministériu Turizmu Komérsiu no Indústria (MTKI) liu hosi Inspesaun Jerál Alimentár no Ekonómika realiza treinamentu kona-ba tékniku verifikasaun Bomba Kombustível ba nia funsionáriu hamutuk 15, durante loron tolu iha Salaun konferénsia Merkadu Antigu, Díli.

Treinadór ba treinamentu tekniku ne’e, MTKI konvida reprezentante tékniku nain rua husi “Dinas Perindustrian dan Perdagangan” provinsia Nusa Tenggara Timur (NTT), iha Indonesia.

Objetivu treinamentu ne’e atu hasa’e kapasidade funsionáriu sira nian atu nune’e bele kontrola bomba kombustivel iha Timor laran tomak, nune’e bele defende direitu konsumidór sira nian.

Diretora Jerál MTKI, Manuela Corte Real iha nia diskursu badak bainhira halo abertura ofisiál ba treinamentu ne’e, loron 15 fulan Novembru, iha salaun konferésia Merkadu Antigu, Díli, husu ba partisipante hotu atu aproveita didi’ak treinamentu ne’e.

Diretora Jerál iha okaziaun ne’e rekoñese katak iha Timor-Leste iha minimu koñesimentu kona-ba kontrolu bomba kombustivel. Tanba ne’e, Diretora-Jerál afirma, partisipante sira tenke akompaña no labele lakon le’et de’it oportunidade ne’e: “Karik ita bo’ot sira la aproveita ho didi’ak ita bo’ot sira mak lakon. Tanba treinamentu ne’ebé Governu fasilita ne’e di’ak ba imi nia futuru hanesan privadu no ba instituisaun, se lae, sei difikulta imi nia servisu no afeta ba públiku”.

Entretantu iha oportunidade ida ne’e mós, reprezentante treinad’o husi NTT, Tri Daryono, subliña katak, nia parte haksolok tebe-tebes ho kooperasaun ne’ebé iha entre Indonesia ho Timor-Leste, tanba ne’e nia hodi nasaun Indonézia nia naran fó obrigadu barak ba kompromisu ne’ebé Timor-Leste iha, tanba bele realiza treinamentu ne’e no hametin liu tan kooperasaun entre nasaun rua espera katak, koperasaun ne’ebé iha bele sai di’ak liu tan iha futuru.