Governu Timor-Leste Hato'o Parabéns ba Vietname ba Aniversáriu Libertasaun Súl no Loron Reunifikasaun Nasionál ba da-50
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 30 fulan-abril tinan 2025
Komunikadu Imprensa
Governu Timor-Leste Hato'o Parabéns ba Vietname ba Aniversáriu Libertasaun Súl no Loron Reunifikasaun Nasionál ba dala 50
Primeiru-Ministru Repúblika Demokrátika Timor-Leste, Kay Rala Xanana Gusmão, haruka mensajen felisitasoins ida ba nia omólogu Repúblika Sosialista Vietname, Pham Minh Chinh, iha okaziaun Aniversáriu Libertasaun Súl no Loron Reunifikasaun Nasionál ba da-50.
“Lori Governu no povu Repúblika Demokrátika Timor-Leste nia naran, ho laran-tomak ha’u hato’o ami-nia parabéns ba Repúblika Sosialista Vietname iha okaziaun istóriku ida-ne’e”, Xefe Governu hateten iha karta ne’ebé haruka iha loron 30 fulan-abríl.
Iha mensajen, Xanana Gusmão subliña katak "marku ida-ne'e nu’udar momentu orgullu nasionál ida ne'ebé kle'an ba Vietname no hanesan testemuñu korajen, reziliénsia no determinasaun nian ida ne’ebé estraordináriu hosi povu vietnamita iha sira-nia esforsu atu hetan independénsia, unidade no dame." Nia hatutan tan katak "Vietname nia reunifikasaun tau ona baze ba progresu, dezenvolvimentu no lideransa internasionál ne'ebé estraordináriu."
Primeiru-Ministru destaka mós “relasaun konfiansa no amizade ne’ebé metin” entre Timor-Leste no Vietname, hodi valoriza “lasu solidariedade ne’ebé harii entre nasaun rua ne’e” no espresa Governu Timor-Leste nia hakarak “hodi hametin kooperasaun ne’e iha futuru”.
Hodi marka “aniversáriu markante ida-ne’e”, Xanana Gusmão reafirma “amizade no apoiu kontínuu Timor-Leste nian” no hato’o esperansa atu “kontinua serbisu hamutuk hodi promove dame, dezenvolvimentu no prosperidade iha ita-nia rejiaun no liután”. REMATA
