Ho objetivu atu promove produtu lokál sira timor nian ne’ebé feto sira dezenvolve, no selebra Loron Internasionál Feto Rurál nian, ne’ebé monu iha loron 15 fulan Outubru nian, Institutu Apoiu ba Dezenvolvimentu Emprezariál husi Ministériu Ekonomia no Dezenvolvimentu nian (IADE – MED), Sekretaria Estadu Promosaun Igualdade (SEPI) Sekretaria Estadu Formasaun Profisionál no Empregu (SEFOPE) organiza, ba tinan datoluk, Feira FIAR (Feto iha Servisu ba An Rasik).

Maria Filomena Babo Martins, Xefe Departamentu Formasaun no Edukasaun SEPI nian esplika katak “tema Feira Fiar tinan ida ne’e nian mak ‘Feto Rurál no Produtu Lokál’ no inisiativa, aleinde promove produtu lokál sira ne’ebé feto sira halo, hakarak mós atu insentiva sira hodi dezenvolve sira nia servisu atu bele hetan rendimentu ba sira rasik, hodi nune’e bele tulun sira nia família”.

Tinan tinan, tamañu no rendimentu feira ne’e nian aumenta ba beibeik. Iha tinan kotuk iha espozitór hamutuk 55 no osan ne’ebé hetan husi buat hirak ne’ebé fa’an hamutuk dolar rihun 25. Tinan ida ne’e valór ne’ebé iha aumenta ba dolar rihun 28 no númeru espozitór nian mak 69.

Tanba Feira ne’e dedika ba feto sira, feto sira de’it mak bele espór s ira nia produtu. Atu sira bele halo ida ne’e, sira tenke aprezenta proposta ida ba SEPI, SEFOPE ka ba IADE – MED. Haree katak espozitór sira barak liu la’ós husi Dili, oraganizadór feira nian sira define katak proposta sira bele submete ba departementu sira iha distritu sira.

Prosesu organizasaun Feira nian definidu no implementadu ona ho di’ak, nu’udar Maria Filomena Babo Martins esplika: “husi proposta sira ne’ebé ami simu, ami  halo selesaun no hili hirak ne’ebé iha rezultadu di’ak iha implementasaun ba sira nia projetu sira, katak produtu ne’ebé halo ho di’ak no bele fa’an iha feira. Selesaun ne’e halo iha distritu sira. Bainhira definidu ona sei hatene grupu hira mak sei mai espór sira nia produtu – tinan ida ne’e grupu sira ne’ebé mai hamutuk 69, husi distritu 13 – ami prepara no tau númeru ba stands sira, no bainhira grupu sira to’o sira ba diretamente ba sira nia fatin ne’ebé marka tiha ona no hahú organiza sira nia espozisaun ho produtu hirak ne’ebé sira lori husi teritóriu nasionál tomak”. SEPI mós tulun feto hirak ne’ebé espór sira nia produtu iha feira liu husi fó verba ida ba preparasaun no dezlokasaun.

Oraganizasaun hakarak mantein atu realiza feira ne’e tinan ida dala ida, “liuliu atu komemora Loron Internasionál Feto Rurál nian. Espozitór sira  sujere atu ami realiza feira ne’e la’ós dala ida ida de’it iha tinan ida, iha fatin própriu ida … sira husu merkadu rasik ida iha Dili ka iha distritu sira seluk” , Xefe Departamentu Formasaun no Eukasaun SEPI nian adianta.