……………………………………………………………………………………………………………
Loron 5 fulan-maiu tinan 2025
Komunikadu Imprensa
Governu Timor-Leste Hato’o Parabéns ba Lawrence Wong ne’ebé Eleitu nu’udar Primeiru-Ministru Singapura
Lawrence Wong lidera Partidu Asaun Populár (PAP) ba vitória iha eleisaun jerál ne’ebé hala’o iha loron 3 fulan-maiu tinan 2025, ne’ebé hametin nia mandatu hafoin simu knaar nu’udar Primeiru-Ministru iha fulan-maiu tinan 2024. Ida ne’e akontese hafoin Lee Hsien Loong, ne’ebé xefia ona Governu Singapura durante dékada rua, remata ona ninia mandatu.
Iha mensajen ne’ebé haruka, Xefe Governu timorense destaka katak “rezultadu abranjente ne’e hanesan demonstrasaun forte ida ba konfiansa ne’ebé povu Singapura iha ba ita-boot nia lideransa, ita-boot nia jestaun ba nasaun no ita-boot nia vizaun ba futuru Singapura nian”.
Primeiru-Ministru subliña mós “papél estabilizadór fundamentál iha Sudeste Aziátiku no liután” ne’ebé dezempeña hosi Singapura, no hatutan katak ” lideransa ita-boot nia país iha promosaun komérsiu nakloke, investimentu no kooperasaun, no mós defeza ba diálogu no dame, kontribui maka’as ba dezenvolvimentu no prosperidade ita-nia rejiaun nian”.
Primeiru-Ministru Xanana Gusmão espresa nia apresiasaun ba “relasaun amizade no kooperasaun ne’ebé metin” entre Timor-Leste no Singapura, no hato’o esperansa atu “iha kolaborasaun metin [ho Governu Lawrence Wong] atu nune’e hametin liután ita-nia lasu bilaterál no esplora área foun sira ne’ebé fó benefísiu mútuu”.
Hodi reafirma kompromisu Timor-Leste nian ba integrasaun rejionál, Xefe Governu timorense agradese ba “apoiu prátiku husi Singapura, liuliu ninia asisténsia hodi hametin ami-nia funsaun públika atu prepara adezaun ba ASEAN”, ne’ebé “reflete espíritu solidariedade no parseria ne’ebé apoia ita-nia rejiaun”.
Primeiru-Ministru konklui ninia mensajen hodi reafirma dezeju atu “aprofunda relasaun entre país rua no hodi kontribui ba pás, estabilidade no seguransa iha rejiaun ne’e”.
Ministru Prezidénsia Konsellu Ministrus no Portavós Governu, Agio Pereira, subliña katak “Singapura sai nu’udar parseiru ida ne’ebé konsistente no estratéjiku ba Timor-Leste, la’ós de’it iha prosesu adezaun ba ASEAN, maibé mós iha fahe koñesimentu no kapasidade institusionál. Primeiru-Ministru Lawrence Wong nia lideransa reprezenta kontinuidade konfiansa no oportunidade foun ida atu hakle’an ita-nia kooperasaun bilaterál”. REMATA