……………………………………………………………………………………………………………
Loron 4 fulan-maiu tinan 2025
Komunikadu Imprensa
Governu Timor-Leste Felisita Anthony Albanese ba nia Reeleisaun hanesan Primeiru-Ministru Austrália
Governu Repúblika Demokrátika Timor-Leste ho laran-tomak hato’o parabéns ba Primeiru-Ministru Anthony Albanese ne’ebé re-eleitu hodi lidera Governu Commonwealth Austrália nian.
Durante mandatu dahuluk, Primeiru-Ministru Albanese hala’o papél importante ida hodi aprofunda relasoins bilaterais entre Timor-Leste no Austrália, ne’ebé reflete iha kooperasaun ne’ebé aumenta iha área estratéjika oioin, no mós diálogu ne’ebé kontinua kona-ba esplorasaun konjunta ba rekursus iha Tasi Timór.
Ministru Prezidénsia Konsellu Ministrus, Portavós Governu no interlokutór Timor-Leste nian iha negosiasaun kona-ba Projetu Greater Sunrise, Agio Pereira, afirma katak “Governu Timor-Leste hein atu kontinua serbisu hamutuk ho Primeiru-Ministru Albanese no ninia administrasaun hodi avansa ita-nia objetivu komún sira no aprofunda liután ita-nia relasaun bilaterál.”
Timor-Leste reafirma ninia kompromisu ba parseria ida ne’ebé bazeia ba respeitu mútuu, boa fé no vontade hamutuk hodi promove pás, estabilidade no prosperidade iha rejiaun ne’e, no dezeja ba Primeiru-Ministru Anthony Albanese atu susesu nafatin iha ezersísiu ninia mandatu, nune’e mós progresu kontínuu no moris-di’ak ba povu australianu. REMATA