Timor-Leste Partisipa iha Reuniaun Funsionárius Importantes ASEAN nian no Reafirma Prontidaun atu Kontribui ba Organizasaun nia Pilár Tolu
Delegasaun governu ida, ne’ebé lidera husi Milena Rangel, Vise-Ministra ba Asuntus ASEAN no Lider hosi Reuniaun Funsionárius Importantes (SOM) Timor-Leste nian, partisipa iha Reuniaun Funsionárius Importantes ASEAN nian no sesaun sira ne’ebé iha relasaun, ne’ebé hala’o hosi loron 28 to’o 29 fulan-abríl tinan 2025, iha Kuala Lumpur, Malázia. 
Delegasaun ne’e mós marka prezensa iha Sorumutu hosi Komité Ezekutivu Komisaun Zona Livre Arma Nukleár Sudeste Aziátiku (SEANWFZ EXCOM) no Sorumutu Grupu Traballu Konsellu Koordenasaun ASEAN nian ba dala 18 kona-ba Pedidu Adezaun Timor-Leste ba ASEAN (ACCWG-TL).
Iha loron 29 fulan-abril 2025, durante reuniaun ACCWG-TL ba dala 18, Augusto Júnior Trindade, Vise Ministru Komérsiu no Indústria, marka prezensa mós nu’udar Lider Indikativu ba Reuniaun Funsionáriu Importantes Ekonomia (SEOM) nian no Céu Brites, Vise-Ministra Solidariedade Sosiál no Inkluzaun, nu’udar reprezentante iha Komité Funsionárius Importantes ba Komunidade Sósiu-Kulturál ASEAN (SOCA). Prezensa husi Vise-Ministru na’in-tolu iha reuniaun importante ida-ne’e reforsa Timor-Leste nia kompromisu ba pilár tolu husi ASEAN no destaka relevánsia husi prosesu ACCWG-TL hodi apoia perkursu nasaun ne’e nian ba adezaun plena. 
Durante sorumutu ne’e, Sekretariadu ASEAN, reprezentante sira husi ASEAN, SEOM no SOCA fó informasaun ba lider SOM sira kona-ba dezenvolvimentu ikus iha roteiru Timor-Leste nian ba adezaun plena.
Durante reuniaun, Vise-Ministra Milena Rangel hateten katak “Timor-Leste nia partisipasaun iha reuniaun importante sira ASEAN nian ne’e reflete ami-nia kompromisu metin ba integrasaun plena iha família ASEAN. Pasu ida-idak ne’ebé ami halo hamutuk ho ami-nia parseiru sira hametin ami-nia vizaun hamutuk kona-ba pás, prosperidade no integrasaun rejionál”. 
Nia hatutan tan katak “enkontru ACCWG-TL ba dala 18 ne’e nu’udar oportunidade ida atu reafirma progresu ne’ebé halo ona dezde ami-nia kandidatura inisiál iha tinan 2011 no hatudu Timor-Leste nia prontidaun atu kontribui maka’as ba komunidade ASEAN iha ninia pilár tolu – polítika no seguransa, ekonómiku no sósiu-kulturál. Ami agradese ba apoiu no amizade hosi Estadus-Membrus ASEAN durante perkursu istóriku ida-ne’e.” 
