Membrus Governu Konstitusionál balu marka prezensa iha serimónia simu pose hosi Juis Afonso Carmona nu’udar Prezidente Tribunál Rekursu, ne’ebé hala’o iha Palásiu Prezidensiál Nicolau Lobato, Dili, iha loron 29 fulan-abríl tinan 2025. 

Husi membrus Ezekutivu ne’ebé partisipa iha serimónia ne’e, inklui Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay; Vise-Primeiru-Ministru, Ministru Korrdenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino; Ministru Prezidénsia Konsellu Ministrus, Agio Pereira; Ministru Justisa, Sérgio de Jesus Fernandes da Costa Hornai; Ministru Administrasaun Estatál, Tomás do Rosário Cabral; Ministru Defeza, Donaciano do Rosário Gomes; no Vise-Ministru ba Fortalesimentu Institusionál, Paulo Manuel da S. dos Remédios. 

Nomeasaun Juis Afonso Carmona ne’e, formaliza liuhusi Dekretu Prezidente Repúblika n. 35/2025, ne’ebé asina husi Prezidente José Ramos-Horta. Nomeasaun ida-ne’e mai hosi kompeténsias konstitusionais ne’ebé atribui ba Tribunál Rekursu ne’ebé, hanesan instánsia másima husi organizasaun judisiária iha Timor-Leste, hala’o funsaun Supremu Tribunál Justisa nian ho provizóriu to’o instalasaun órgaun ida-ne’e nian.

Dekretu prezidensiál ne’e haktuir ho klaru katak nomeasaun ne’e halo “tuir termu alínea j) husi artigu 86.º, konjugadu ho n. 3 husi artigu 124.º, no n. 2 husi artigu 164.º Konstituisaun Repúblika Demokrátika Timor-Leste”.