Timor-Leste kontinua fó omenajen ba memória Sua Santidade Papa Francisco, ne’ebé hakotu iis iha loron 21 fulan-abríl 2025, iha ninia rezidénsia iha Sidade Vatikanu. Lutu nasionál, ne’ebé dekreta hosi Konsellu Ministrus iha nia sorumutu estraordináriu iha loron 22 fulan-abríl, sei vigora nafatin to’o meianoite loron 28, ho Bandeira Nasionál ne’ebé tenke hasa’e to’o klaran de’it iha edifísiu públiku sira hotu. 

Iha sábadu, loron 26 fulan-abríl, loron serimónia funerál Santu Padre nian, sei hala’o misa solene ida iha Tasi Tolu hahú tuku 6:00 lokraik, ne’ebé organiza hanesan espresaun agradesimentu no omenajen ikus ba Amu-Papa Francisco. Fatin, ne’ebé sai uma-na’in ba selebrasaun eukarístika istórika hosi ninia vizita apostólika iha Timor-Leste, iha fulan-setembru 2024, agora sei halibur dala ida tan komunidade katólika timoroan, iha jestu komuñaun no fiar nian. Igreja husu ba sarani sira atu hatais roupa mutin durante selebrasaun nu’udar lembransa ba Santu Padre nia vizita. 

Governu Timor-Leste sei reprezenta iha serimónia funerál iha Vatikanu hosi Ministru Negósius Estranjeirus no Kooperasaun, Bendito dos Santos Freitas, ne’ebé sei akompaña Prezidente Repúblika, José Ramos-Horta. Timór-Leste mós sei reprezenta hosi kardeál Dom Virgílio do Carmo da Silva, Arsebispu Dili nian, membru Koléjiu Kardinalísiu no ida hosi kardeál na’in-135 ne’ebé bele iha direitu atu vota iha eleisaun ba futuru Amu-Papa. 

Hafoin Sua Santidade nia mate, Governu fó-sai komunikadu kondolénsias ida, ne’ebé espresa katak “Ho laran triste tebes no sentimentu ne’ebé kle’an, bainhira Timor-Leste simu notísia kona-ba Sua Santidade Papa Francisco nia mate, lider espirituál ida ne’ebé ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira.” Portavós Governu no Ministru Prezidénsia Konsellu Ministrus Agio Pereira hateten katak, Amu-Papa nia vizita “liu fali vizita simples ida. Hanesan enkontru ida ne’ebé kle’an ho povu ida ne’ebé sofre maka’as hodi hetan ninia liberdade no independénsia. Santu Padre to’o iha Timor-Leste no manán nasaun ida nia fuan no klamar, hodi husik hela mensajen ida ne’ebé forte tebes: atu imi-nia fiar sai imi-nia kultura — no povu timoroan bele halo ida-ne’e. Kultura rekonsiliasaun, toleránsia no perdaun nian. Kultura povu ida ne’ebé tau, iha nivel aas liu hosi sira-nia ezisténsia, valór dame nian, armonia no solidariedade nian. Ita-nia povu sei agradese nafatin ba Santu Padre nia esforsu sira hodi fó mai ita enkontru ida-ne’e – uniaun sagradu ida-ne’e. “Hodi Governu no povu timoroan nia naran”, Portavós Governu hato’o “sentidas kondolénsias ba Igreja Katólika, Koléjiu Kardeál sira, povu Arjentinu no sarani sira hotu iha mundu tomak.”

Membrus Governu Konstitusionál IX iha loron 22 fulan-abríl, bá iha Rezidénsia Episkopál, iha Lesidere, hodi fó mós omenajen pesoál ba Sumu Pontífise no asina livru kondolénsias. Jestu simbóliku ida-ne’e hodi povu Timor-Leste nia naran atu reafirma, apresiasaun ba Sua Santidade nia moris no obra. 

Iha territóriu nasionál tomak, manifestasaun omenajen nian aumenta ba beibeik. Sarani sira halo orasaun iha sira-nia parókia no iha Monumentu Nain Feto iha Lesidere, iha ne’ebé hala’o misa loroloron dezde loron 22 fulan-abríl. Parókia sira seluk no komunidade iha munisípiu oioin mós selebra Eukaristia sira hodi fó onra ba Papa Francisco, no espiritualmente hamutuk ho serimónia sira iha Vatikanu. 

Importante atu hanoin katak, iha ninia vizita internasionál ida ikus nian, Papa Francisco iha Timor-Leste hosi loron 9 to’o 11 fulan-setembru tinan 2024, ida-ne’e nu’udar vizita apostólika istórika ida. Ninia prezensa mobiliza sarani rihun atus ba atus, ho misa iha Tasi Tolu, sarani ne’ebé partisipa rihun 600 resin, sai hanesan momentu ida ne’ebé markante liu. Durante estadia, Santu Padre husik hela mensajen esperansa no unidade, hodi destaka knaar juventude no apresia valór kulturál no espirituál povu Timor-Leste nian. 

Nu’udar sinál rekoñesimentu, hafoin nia fila-fali ba Roma, Papa Francisco dirije karta agradesimentu ida ba Primeiru-Ministru, Kay Rala Xanana Gusmão, hodi espresa “agradesimentu kle’an ba resesaun ne’ebé di’ak no apoiu ne’ebé fó” durante vizita ne’e. “Fila fali ba Roma ho fuan ne’ebé kontente kona-ba loron sira ne’ebé ha’u hela iha Timor-Leste, ha’u mai atu hato’o hikas ha’u-nia agradesimentu ba Primeiru-Ministru no, liuhosi nia, ba sira ne’ebé iha dalan ida ka seluk kontribui hodi halo ha’u nia Viajen Apostólika ba Nasaun ne’ebá sai posivel no fó rezultadu”, hakerek Sumu Pontífise, hodi espresa ninia ksolok ba loron sira ne’ebé nia pasa iha país ne’e. 

Iha sorumutu loron 23 fulan-abríl, Konsellu Ministrus deside hodi nomeia Ministériu Administrasaun Estatál nu’udar departamentu governamentál ne’ebé reprezenta Governu hodi sai responsavel ba koordenasaun ho Konferénsia Episkopál Timorense, atu organiza serimónia ne’e. Desizaun ida-ne’e ho objetivu atu hala’o serimónia ida ne’ebé digna, no ne’ebé reprezenta domin boot povu timoroan nian ba Santu Padre.