Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuady Lay, reprezenta Timor-Leste iha Sorumutu Hamutuk ba da-37 Komisaun Turizmu Nasoins Unidas nian ba Ázia Oriental no Pasífiku no Komisaun ba Ázia Meridionál (CAP-CSA, sigla iha lian inglés) nian, nune’e mós Sorumutu sira ba da-56 no da-60 nian kona-ba komisaun rejionál sira no Konferénsia Rejionál ONU Turizmu nian kona-ba “Polítika Turizmu iha Ekonomia Sirkulár”, ne’ebé hala’o entre loron 15 no 16 fulan-abril, iha Jakarta, Indonézia. 

Sorumutu hirak-ne’e nu’udar forum anuál prinsipál sira Turizmu ONU nian iha rejiaun Ázia no Pasífiku no halibur reprezentante altu nivel Estadus-Membrus, Membru afiliadu no organizasaun internasionál no rejionál sira, ho objetivu atu hametin diálogu estratéjiku no aliña polítika públika sira ne’ebé promove turizmu sustentável, reziliente no inkluzivu. Programa ne’e inklui aprezentasaun Planu Serbisu Turizmu ONU nian ba tinan 2025-2026 no debate kona-ba dezafiu prinsipál no prioridade komún sira rejiaun nian. 

Iha ámbitu Konferénsia Rejionál kona-ba Polítika Turizmu iha Ekonomia Sirkulár, Vise-Primeiru-Ministru halo parte iha painél debate altu nivel nian ne’ebé dedika ba integrasaun prinsípiu sira ekonomia sirkulár nian iha polítika públika iha setór refere, hamutuk ho reprezentante sira hosi Indonézia, Maldivas, Filipina no entidade relevante sira seluk hosi setór emprezariál no institusionál. Sesaun ne’e destaka estratéjia hodi hamenus desperdísiu, hadi’a jestaun rekursu ne’ebé sustentável no promove modelu turizmu ne’ebé kombina dezenvolvimentu ekonómiku no prezervasaun ambientál. 

Iha ninia intervensaun, Francisco Kalbuady Lay subliña katak, turizmu maka ferramenta poderoza ida ba dezenvolvimentu no, ba Timor-Leste, nu’udar motor fundamentál ida ba kreximentu ekonómiku”. Ho poténsia atu “kria empregu ba ita-nia joven sira, ajuda kompañia ki’ik sira hodi buras, lori investimentu mai ita-nia país no mós ajuda proteje ita-nia ambiente naturál ne’ebé furak”, nia subliña.

Vise-Primeiru-Ministru mós Temi katak polítika turizmu Governu nian bazeia ba pilár fundamentál tolu: kreximentu ekonómiku, inkluzaun sosiál no protesaun ambientál. “Ami hakarak turizmu atu apoia negósiu lokál sira, hadi’a ami-nia povu nia moris-di’ak no harii ekosistema ekonómiku ida ne’ebé sustentável, hodi garante katak turizmu fó benefísiu ba ema hotu, inklui feto, komunidade rurál no kompañia ki’ik sira. No ami hakarak proteje ami-nia natureza ne’ebé furak – ami-nia tasi-ibun, ai-laran no moris tasi nian – atu nune’e jerasaun sira iha futuru bele goza mós natureza nia furak.”

Governante ne’e afirma hikas kompromisu Timor-Leste nian ba modelu turizmu ekolójiku no sustentável, bazeia ba valorizasaun natureza no kultura Timor-Leste nian. “Ami haksolok atu diskute kona-ba Ekonomia Sirkulár iha Turizmu. Iha Timor-Leste, ami fiar iha turizmu ekolójiku, iha-ne’ebé vizitante sira apresia natureza no, iha tempu hanesan, sira proteje natureza. Ho apoiu husi ONU Turizmu no ami-nia parseiru rejionál sira, Timor-Leste sei kontinua dezenvolve turizmu ida ne’ebé fó benefísiu ba ami-nia povu, respeita ami-nia kultura no proteje ami-nia ambiente.”

Iha enserramentu, Vise-Primeiru-Ministru Francisco Kalbuadi Lay agradese ba ONU Turizmu no Governu Indonéziu ba organiza eventu ne’e no fó konvite ida: “Ha’u konvida ema hotu atu vizita Timor-Leste, esplora ami-nia eransa kulturál ne’ebé riku no haree ami-nia rain nia beleza ne’ebé inkrivel. Hamutuk, ita bele harii futuru turizmu ida ne’ebé sustentável no prósperu iha ita-nia rejiaun.”