Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, lidera delegasaun Timor-Leste iha serimónia abertura Expo 2025 Osaka, Kansai, Japaun, ne’ebé hala’o iha illa artifisiál Yumeshima, husi loron 13 fulan-abríl to’o loron 13 fulan-outubru tinan 2025, ho lema “Harii sosiedade aban-bainrua nian ba ita-nia moris”. Akompaña husi membrus Governu no Parlamentu Nasionál, Vise-Primeiru-Ministru subliña importánsia husi espozisaun universál ida-ne’e hanesan plataforma atu promove identidade nasionál, poténsia ekonómika no reforsu relasoins multilaterais. 
Timor-Leste partisipa ofisialmente iha eventu ida-ne’e, hamutuk ho nasaun besik 160, rejiaun no organizasaun internasionál sira, iha espozisaun ida ne’ebé organiza hosi Bureau International des Expositions (BIE), ne’ebé kria hanesan laboratóriu moris ida ho ideia no solusaun ba dezafiu globál. Prezensa timoroan nian sai konkretu liuhosi pavillaun nasionál ida ne’ebé integra iha área ne’ebé dedika ba Estadu-Membru sira ASEAN nian, iha ne’ebé diversidade kulturál nasaun nian aprezenta ba mundu, ho énfaze iha tais, traje tradisionál, produtu artezanatu, rekursus naturais no destinu turístiku sira. 
Iha vizita ofisiál ne’e, delegasaun Timor-Leste nian hetan oportunidade hodi vizita pavillaun sira hosi nasaun oioin iha rejiaun ne’e, inklui Austrália, Malázia no Indonézia. Sekretáriu-Jerál ASEAN, Kao Kim Hourn, vizita mós pavillaun Timor-Leste nian, ne’ebé nia simu hosi Vise-Primeiru-Ministru no membru komitiva sira seluk.
Delegasaun ofisiál ne’e inklui Sekretáriu Estadu Kooperativas, Arsénio Pereira da Silva, Sekretáriu Estadu Peskas, Domingos da Conceição dos Santos, no reprezentantes Parlamentu Nasionál nian, hanesan Prezidente Komisaun C, Deputada Cedelizia Faria dos Santos, Prezidente Komisaun B, Deputadu Domingos Augusto, Prezidente Komisaun D, Deputadu Ricardo Baptista. Embaixadór Timor-Leste iha Japaun, Ilídio Ximenes da Costa, mós halo parte iha komitiva nasionál ne’e. 
Timor-Leste nia partisipasaun iha Expo 2025 nu’udar oportunidade estratéjika ida atu hametin nasaun nia prezensa internasionál, atrai investimentu, promove interkámbiu kulturál no ekonómiku, no afirma nia kompromisu ba Objetivus Dezenvolvimentu Sustentável Nasoins Unidas nian. Loron Nasionál Timor-Leste nian iha Expo marka ona ba loron 28 fulan-agostu tinan 2025, data ida ne’ebé sei sai hanesan selebrasaun espesiál ida ba kultura nasionál. 
