Ministru Komérsiu no Indústria, Nino Pereira, reprezenta Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, partisipa iha Meza Redonda Ministeriál kona-ba Investimentus iha Setór Turizmu, ne’ebé hala’o iha ámbitu Kongresu AIM tinan 2025 Annual Investment Meeting (Sorumutu Anuál Investimentu nian), ne’ebé hala’o iha loron 7 to’o 9 fulan-abríl, iha Abu Dhabi, Emiradus Árabes Unidus. 
Kongresu AIM nu’udar plataforma internasionál ida ne’ebé dedika ba promosaun investimentu globál no fortalesimentu kooperasaun ekonómika entre país sira. Edisaun tinan 2025 reúne ministru na’in-60 resin, xefes Estadu, prezidentes bankus sentrais, emprezárius, investidores no espesialistas husi mundu tomak, ho tema “Mapeamentu ba Futuru Investimentu Globál: Laloran Foun husi Senáriu Investimentu Globalizadu – Ba Estrutura Mundiál ida ne’ebé Ekilibrada”. Eventu ne’e ko’alia kona-ba setores estratéjikus oin-oin, inklui investimentu diretu estranjeiru, komérsiu, sidade sira ba futuru, finansas, teknolojia, enerjia, agrikultura intelijente, saúde no turizmu.
Iha ninia partisipasaun iha Meza Redonda Ministeriál ne’ebé dedikada ba turizmu, Ministru Nino Pereira aprezenta estratéjia Governu nian atu promove investimentu iha setór ida-ne’e, ne’ebé konsidera prioritáriu ba diversifikasaun ekonómika no dezenvolvimentu sustentavel país nian. Iha ninia intervensaun, Ministru afirma katak “Governu Timor-Leste iha kompromisu atu kria ambiente ida ne’ebé atrativu ba investimentu privadu iha turizmu, hodi foka valorizasaun patrimóniu naturál no kulturál, melloria infraestruturas no kualifikasaun rekursus umanus”. 
Ministru salienta mós katak Timor-Leste akompaña tendénsias globais iha setór ne’e, hanesan prokura ne’ebé aumenta ba beibeik ba esperiénsias sustentaveis, dijitalizasaun servisus turístikus, dezenvolvimentu infraestruras rezilientes no fortalesimentu turizmu komunitáriu. “Ami implementa hela medidas konkretas iha ámbitu Planu Estratéjiku Dezenvolvimentu tinan 2011-2030, ne’ebé inklui expansaun konektividade aérea, reformas regulatórias hodi fasilita investimentu, no parserias ho ajénsias internasionais no atores rejionais”, nia afirma.
Prezensa Timor-Leste nian iha kongresu ne’e fó mós oportunidade atu troka esperiénsias ho país sira ne’ebé implementa modelu dezenvolvimentu turístiku ne’ebé bele adapta ba kontestu timoroan nian, no reforsa koñesimentu kona-ba mekanizmus finansiamentu, parserias públiku-privadas no prátikas lejizlativas ne’ebé di’ak. 
Elias de Jesus Fátima, Koordenadór Gabinete Kooperasaun, Parseria no Reforma hosi Ministériu Komérsiu no Indústria, akompaña Ministru iha eventu ne’e.