……………………………………………………………………………………………………………
Loron 10 fulan-abril tinan 2025
Komunikadu Imprensa
Toleránsia pontu iha parte loraik iha loron 17 fulan-Abril no loron tomak iha loron 21 fulan-Abril tinan 2025 iha okaziaun Selebrasaun Páskua nian
Konsidera katak tinan ida-ne’e, Sesta-Feira Santa no Páskua selebra iha loron 18 to’o 20 fulan-abril;
Hodi konsidera katak tuir alínea a) hosi n. 2 artigu 7.º hosi Lei n. 10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu, no hosi Lei n. 10/2023, loron 5 fulan-abríl, prevee katak bele fó toleránsia pontu iha okaziaun data komemorativa ofisiál;
Konsidera katak tuir alínea b) hosi n. 2 artigu 5.º husi Lei n. 10/2005, loron 10 fulan-agostu, ne’ebé altera hosi Lei n. 3/2016, loron 25 fulan-maiu, no hosi Lei n. 10/2023, loron 5 fulan-abril, “Kinta-feira Santa, nu’udar parte hosi loron komemorasaun Páskua kristaun sira nian” hanesan data komemorativa ofisiál, ho data ne’ebé variavel;
Haree ba faktu katak selebrasaun relijioza “Kinta-feira Santa” nian iha importánsia no signifikadu boot ba ema fiar-na’in barak, ne’ebé baibain partisipa iha serimónia relijioza sira ne’ebé hala’o iha tempu Páskua nian;
Hodi konsidera prátika ne’ebé hala’o tiha ona antes ne’e, bazeia ba alínea b) husi n. 2 artigu 5.º husi lei ne’ebé temi ona;
Ho hanoin katak baibain ema barak maka sei dezloka ba área rurál sira atu nune’e bele partisipa iha selebrasaun relijioza sira Páskua nian ho sira-nia família;
Konsidera mós katak, tuir dispostu iha alínea d) hosi n. 6 artigu 7.º hosi Lei n. 10/2005, loron 10 fulan-agostu, ne’ebé altera hosi Lei n. 3/2016, loron 25 fulan-maiu, no hosi Lei n. 10/2023, loron 5 fulan-abril, kompeténsia Primeiru-Ministru nian atu fó toleránsia pontu ba “funsionáriu no ajente sira hosi ministériu ka servisu sira ne’ebé dependente ba sira, no mós institutu no organizmu sira ne’ebé integradu iha administrasaun indireta Estadu nian”;
Nune’e, tuir dispostu iha alínea a) hosi n. 2 no iha alínea d) hosi n. 6 artigu 7.º hosi Lei n. 10/2005, loron 10 fulan-agostu, ne’ebé altera hosi Lei n. 3/2016, loron 25 fulan-maiu, no hosi Lei n. 10/2023, loron 5 fulan-abríl, Primeiru-Ministru, liuhosi Despaxu N. 010/PM/IV/2025, loron 9 fulan-abríl tinan 2025, determina hanesan tuirmai:
1. Fó toleránsia pontu:
a) Iha loron 17 fulan-abríl tinan 2025, hahú husi tuku 12:00;
b) Iha loron 21 fulan-abríl tinan 2025, durante loron tomak.
2. Despaxu ida-ne’e abranje funsionáriu, ajente no traballadór hotu-hotu ne’ebé hala’o atividade iha servisus administrasaun direta Estadu nian, tantu sentrál ka deskonsentradu, ka iha organizmu administrasaun indireta sira.
3. La inklui iha númeru anteriór rekursus umanus hosi servisu públiku sira ne’ebé, tanba natureza hosi atividade ne’ebé sira hala’o, tenke hala’o nafatin serbisu durante períodu ne’e.
4. Sein prejuizu ba kontinuidade no kualidade servisu públiku nian ne’ebé atu halo, dirijentes másimus husi servisu sira ne’ebé maka temi ona iha númeru anteriór, tenke fó dispensa ne’ebé hanesan ba devér asiduidade funsionáriu sira ne’e nian, ne’ebé sei determina bazeia ba oportunidade. REMATA