Governu Timor-Leste

Prezidénsia Konsellu Ministrus

  Portavós Governu Timor-Leste

IX Governu Konstitusionál

...........................................................................................................................

Komunikadu Imprensa

Sorumutu Estraordináriu Konsellu Ministrus nian iha loron 3 fulan-abril tinan 2025

Konsellu Ministrus, ho partisipasaun membru Governu sira hotu, hasoru malu iha Auditóriu Kay Rala Xanana Gusmão, iha Ministériu Finansas, Dili, hodi analiza aprezentasaun kona-ba konkluzaun preliminár auditorias nian ne’ebé hala’o hosi empreza internasionál EY, ba entidade estatál 20 dahuluk ne’ebé hetan ona auditoria hosi totál entidade estatál 45 ne’ebé sei sai alvu ba análize

EY hanesan empreza ida hosi empreza haat kona-ba auditoria no konsultoria globál nian ne’ebé boot-liu, harii iha tinan 1989, ho nia sede iha Londres, Reinu Unidu. Nia koñesidu liu tanba nia esperiénsia hodi hala'o auditoria ba entidade públika sira.

Durante sorumutu ne’e, aprezenta konkluzaun prinsipál no rekomendasaun preliminár hosi auditorias ne’ebé hala’o hela iha entidade oioin administrasaun direta no indireta Estadu nian. Identifika dezafiu prinsipál no áreas ne'ebé presiza hadi'a iha prosesu no prosedimentu sira. Governu simu rekomendasaun hosi EY no reafirma ninia kompromisu ba transparénsia, governasaun di’ak no melloria kontínua ba efisiénsia iha jestaun finansas públikas.

Prosesu auditoria ida-ne’e reflete kompromisus ne’ebé asume hosi Primeiru-Ministru, Kay Rala Xanana Gusmão, iha ninia diskursu simu pose nian, iha ne’ebé nia define hanesan prioridade ida hosi ninia Governu hodi halo auditorias iha instituisaun públika oioin, ho objetivu atu promove responsabilizasaun no rigór ne’ebé boot-liu iha administrasaun Estadu. REMATA