Futura Biblioteka Nasionál Timor-Leste nian, ne’ebé mak planeia hosi Sekretaria Estadu Kultura, oras ne’e to’o ona faze ezekusaun nian. Fatuk dahuluk ba edifísiu nian kala sei hatur iha fulan Agostu tinan 2011.
Tuir Lei orgánika atuál hosi Ministériu Edukasaun, Biblioteka Nasionál ne’e, sei sai hanesan Institutu Públiku ne’ebé mak responsabiliza ba jestaun biblioteka nian sira iha nível nasionál.
Objetivu mak atu halo Biblioteka Nasionál ne’e sai “polu ida ba bibklioteka sira hotu ne’ebé mak eziste”, esplika Virgílio Simith, Sekretáriu Estadu Kultura, hodi hatutan tan katak, “biblioteka barak ne’ebé mak eziste iha país ne’e, iha de’it eskola sira. Biblioteka balun klosan sira mak harii, iha komunidade hirak ne’ebé mak iha inisiativa ida ne’e. Seluk fali, hari hosi ajénsia internasionál sira ne’ebé mak hori uluk kedas dezenvolve ona servisu ida hanesan ne’e. Tanba ne’e mak eziste biblioteka iha distritu oin-oin. Oras ne’e presiza polu ida atu bele superviziona no koordena atividade hotu-hotu biblioteka sira nian.”
Tuir Sekretáriu Estadu Kultura nia hanoin, mak atu transfórma projetu ne’e sai boot liu tan. “Liu hosi dezenvolvimentu servisu sira hamósu kestaun barak, hanesan ezemplu mak fatin ne’ebé atu harii Biblioteka Nasionál. Ita hanoin ona atu harii Biblioteka ne’e iha Aitarak Laran, iha Dili klaran. Kestaun seluk ne’ebé iha hela ita nia neon, mak oinsá atu masimiza projetu ne’e. Defini tiha ona katak Arkivu ne’e sei asosiadu ho Biblioteka, tanba ne’e mak, ita sei hetan Biblioteka Nasionál no Arkivu Timor-Leste nian. Provavelmente, iha faze inisiál ida, sei rai mós iha Biblioteka nia laran kolesaun balun ne’ebé destinadu ba futuru Muzeu. Bele sai mós nu’udar fatin ida ne’ebé diak tebes atu promove eventu kulturál sira. Maibé ita nia objetivu mak atu harii instituisaun ida ho kualidade aas ne’ebé bele apoia mós sistema edukasaun nian.” Biblioteka Nasionál ne’e la’ós de’it atu fó apoiu ba rede nasionál ba biblioteka sira, maibé sei nakloke ba públiku.