Governu, liuhosi Gabinete Apoiu ba Sosiedade Sivíl no reprezenta hosi Vise-Primeiru-Ministru no Ministru Koordenadór Asuntus Sosiais, Mariano Assanami Sabino, no Konferénsia Episkopál Timorense (CET, akrónimu iha lian portugés), ne’ebé reprezenta hosi Pró-Prezidente CET, Kardeál Dom Virgílio da Carmo da Silva, formaliza asinatura akordu subvensaun anuál iha serimónia ida ne’ebé hala’o iha loron 20 fulan-marsu tinan 2025, iha Palásiu Governu, Dili. 

Akordu ida-ne’e estabelese atribuisaun, subvensaun públika ida ho montante totál dolar amerikanu millaun sanulu-resin-lima ba tinan finanseiru 2025 hosi parte Governu, ne’ebé ho objetivu atu hala’o atividades iha área edukasaun (40%), sosiál (20%), governu ekleziál (20%) no ba jestaun subvensaun ne’e rasik (10%). 

Iha eventu ne’e, Vise-Primeiru-Ministru destaka papél importante ne’ebé Igreja hala’o iha dezenvolvimentu kapitál umanu, liuliu iha área edukasaun, no subliña prezensa Igreja Katólika iha Timor-Leste, ho koléjiu sira ne’ebé namkari iha territóriu laran tomak, ne’ebé forma ona lider timoroan barak no kontinua hala’o papél esensiál ida iha edukasaun nasionál. Nia mós hatutan tan katak, aleinde dimensaun relijioza, Igreja Katólika iha Timor-Leste promove kultura ida ne’ebé valoriza asaun sosiál, hodi kontribui maka’as ba dezenvolvimentu sosiedade nian. 

Kardeál Dom Virgílio do Carmo da Silva, iha ninia intervensaun, afirma “katak rekursus husi subvensaun ida-ne’e sei investe iha projetu no asaun sira ne’ebé ho objetivu atu  hatán ba nesesidade ema barak nian, liuliu sira ne’ebé presiza liu”. Nia mós salienta katak “liuhusi ninia obra sosiál, edukativa no pastorál, Igreja kontribui maka’as atu harii sosiedade ida ne’ebé justa, fraterna no solidária liu”. 

Koordenadór Gabinete Apoiu ba Sosiedade Sivíl, Joaquim da Costa Freitas, hateten katak, tuir relatóriu ezekusaun subvensaun 2024, fundus ne’ebé Governu fó permite ona finansiamentu ba projetu maizumenus 300 ne’ebé CET implementa, inklui reabilitasaun no konstrusaun ba edifísiu eskolár, ne’ebé 280 remata ona. Fundus ne’e mós uza ba formasaun profesór sira no asaun sosiál sira, nia hatutan.

Akordu ida-ne’e selebra tuir konkordata ne’ebé asina ona iha loron 14 fulan-agostu tinan 2015, entre Repúblika Demokrátika Timor-Leste no Santa Sé, ne’ebé estabelese enkuadramentu legál ba relasaun bilaterál entre Estadu rua ne’e no Akordu-Kuadru ne’ebé asina ona iha loron 16 fulan-juñu tinan 2017 entre Governu no CET. Akordu sira-ne’e prevee kontribuisaun anuál ida, tuir disponibilidade finanseira Governu nian, ba atividade sosiál, edukasionál no governu ekleziástiku Igreja Katólika nian. Montante  no modalidade fó subvensaun ne’e, regula tinan-tinan hosi akordu espesífiku entre Governu no Konferénsia Episkopál Timorense.

Serimónia ne’e hetan partisipasaun husi Prezidente CET, Bispu Dioseze Maliana, Dom Norberto do Amaral, Vise-Prezidente CET no Bispu Dioseze Baucau nian, Dom Leandro Maria Alves.