Governu, liuhosi Ministériu Asuntus Kombatentes Libertasaun Nasionál (MACLN, sigla iha lian portugés) no iha koordenasaun ho Konsellu Kombatentes Libertasaun Nasionál (CCLN, sigla iha lian portugés), iha loron 18 fulan-marsu tinan 2025, anunsia kona-ba atribuisaun bolsa estudu 1300 ba tinan letivu 2025, ne’ebé fó ba kombatente no martir ba luta libertasaun nasionál sira-nia oan sira. Bolsas ne’e, finansia tomak hosi Estadu, sei fó asesu gratuitu ba edukasaun iha nivel ensinu oioin, tantu iha Timor-Leste nune’e mós iha rai-li’ur.
Anúnsiu ne’e hato’o hosi Ministru Asuntus Kombatentes Libertasaun Nasionál, Gil da Costa Monteiro “Oan-Soru”, durante konferénsia imprensa ne’ebé hala’o iha CCLN, Dili, ho prezensa Sekretáriu Estadu Veteranus, Cesar dos Santos da Silva “Merak”, no reprezentante Konsellu Munisipál Kombatentes Libertasaun Nasionál hosi munisípiu 12 no Rejiaun Administrativa Espesiál Oe-Kusi Ambenu (RAEOA).
Programa bolsa estudu ida-ne’e regula husi Dekretu-Lei n. 8/2009, loron 15 fulan-janeiru, no kobre estudante na’in-100 husi kada munisípiu, husi ensinu báziku to’o ensinu superiór. Númeru vagas ne’ebé define hosi despaxu ministeriál n. 03/MACLN-IXGC/II/2025, ne’ebé estabelese distribuisaun tuirmai:
Bolsas estudu ba ensinu superiór kobre de’it kursus lisensiatura nian, la inklui kursu mestradu no doutoramentu. Kombatente no martir sira-nia oan sira de’it ne’ebé rejista iha prosesu tinan 2003, 2005 no rejista dahuluk iha tinan 2009, maka bele inskreve iha tinan 2025. Sira ne’ebé rejista iha rejistu daruak 2009 nian sei bele kandidata hahú hosi tinan 2026, hafoin remata prosesu verifikasaun no kontestasaun hosi sira-nia dadus.
Períodu ba kandidatura bolsa estudu tinan 2025 sei hahú iha loron 24 fulan-marsu to’o loron 22 fulan-abril iha munisípiu hotu-hotu iha país ne’e. Lista finál hosi kandidatu selesionadu sira sei fó-sai iha fulan-setembru tinan 2025, tantu iha sede Diresaun Nasionál Pensoins no Subvensoins hosi MACLN, Dili no mós iha administrasaun munisipál sira hosi CCLN.