Sorumutu Konsellu Ministrus 4 Novembru 2010
GOVERNU KONSTITUSIONÁL BA DA-IV
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Konsellu Ministrus 4 Novembru 2010
Konsellu Ministrus hala’o sorumutu iha Kuarta-feira ida ne’e, loron 4 fulan Novembru tinan 2010, iha Sala Sorumutu Konsellu Ministrus nian, iha Palásiu Governu, iha Díli, no halo aprovasaun ba:
1. Rezolusaun ne’ebé Aprova Kontinjente Anuál ne’ebé inkorpora iha F-FDTL
Efetivu anuál ne’ebé atu inkorpora iha tinan 2011, ba FALINTIL-Forsa Defeza Timor-Leste (F-FDTL), sei hala’o tuir prosedimentu inkorporasaun úniku, 600 (atus neen) ba feto ka mane.
Kapasidade atu jera rekursu umanu hirak kualifikadu husi Forsa Armada sira, daudaun ne’e, labele liu inkorporasaun rua ba ema 300 (atus tolu) feto ka mane ba tinan ida nian, tanba atu hala’o prosedimentu ba inkorporasaun rua anuál presiza mobiliza meiu barak, laós de’it umanu maibé mós materiál no lojístiku sira, tanba ne’e Konsellu Ministrus deside prosedimentu inkorporasaun úniku ba tinan oin mai.
Atu hanoin de’it katak, F-FDTL sei iha hela faze reorganizasaun no dezenvolvimentu atu kumpri objetivu hirak estabelesidu iha orientasaun estratéjika (FORSA 2020) sira nian.
2. Rezolusaun kona-ba Rekrutamentu Auditór sira ba Kámara Kontas Tribunál Superiór Administrativu, Fiskál no Kontas.
Rekrutamentu, formasaun no kapasitasaun profisionál ba lisensiadu sira ne’ebé sei integra ba futuru kuadru auditór Seksaun Kontas Tribunál Superiór Administrativu, Fiskál no Kontas, sei dezenvolve de’it tuir dependénsia eskluziva Ministra Justisa nian, sei respeita ba lejislasaun aplikável, nune’e mós ba prinsípiu ne’ebé konsagra tiha ona iha Estatutu Funsaun Públika.
Atu hateten lolós katak, Governu Konstitusionál ba Dahaat, haka’as an atu harii no implementa projetu kriasaun Seksaun Kontas Tribunál Superiór Administrativu, Fiskál no Kontas – tribunál ida ne’ebé hanesan órgaun superiór ierarkia ba tribunál administrativu, fiskál no kontas sira, ne’ebé kompete mós, hanesan instánsia únika, fiskalizasaun ba legalidade despeza públika no julgamentu ba kontas Estadu nian.
Projetu ne’e sei dezenvolve ho kolaborasaun husi Tribunál Kontas Portugál nian, tuir Memorandu Entendimentnu ne’ebé halo ona, no ba efeitu ida ne’e, Ministériu Justisa Timor-Leste nian iha hanoin atu rekruta foin-sa’e timoroan ne’ebé halo hotu ona lisensiatura atu tuir kursu espesífiku kona-ba formasaun no kapasitasaun profisionál. Kursu hirak ne’e ninia durasaun mínima mak fulan tolu no sei halo iha Tribunál Kontas Portugál nian. Prevee tiha ona mós realizasaun estájiu Profisionál iha ezersísiu efetivu funsaun nian, ho durasaun tinan ida. Ikus liu, hein katak, lisensiadu foin sa’e hirak ne’e, sei integra iha futura kareira auditór iha Seksaun Kontas nian iha Tribunál Superiór Administrativu, Fiskál no Kontas nian.
Haree ba prioridade projetu no ba espesifisidade rekrutamentu ne’e nian, Konsellu Ministru konsidera katak, situasaun partikulár ida ne’e, bele hasai husi rejime jerál kona-ba rekrutamentu funsionáriu públiku, no sei dezenvolve no depende liu ba Ministériu Justisa.
Konsellu Ministrus halo mós analize kona-ba:
1. Aprezentasaun kona-ba Estratéjia Dezenvolvimentu
Aprezentasaun ida ne’e, ne’ebé Profesór Amérika-Norte nian, husi Universidade Kolómbia, Jeffrey Sachs, mak halo hotu, mosu iha sekuénsia husi ninia aprezentasaun ida uluk, iha reuniaun loron 31 fulan Marsu liubá nian, ba Konsellu Ministru ho nia títulu : “Moris kiak nia rohan – Hadook Timor-Leste husi Konflitu iha Dalan Dezenvolvimentu nian” (“The end of Poverty – Moving Timor-Leste away from conflict towards Development”). Liu husi ida ne’e, Profesór Jeffrey Sachs fó nia vizaun ba Governu kona-ba dezenvolvimentu Nasaun nian, hodi aprezenta planu kona-ba prioridade hirak ne’ebé importante ba país ne’e iha faze ida ne’e.
2. Prosesu Demarkasaun Fronteira Rai-maran
Konsellu Ministru rona ona ekipa husi Ministériu Negósiu Estranjeiru nian ne’ebé dezenvolve hela negosiasaun kona-ba delineamentu fronteira rai-maran nian ho indonézia atu halo hotu prosesu ne’e no define liña atuasaun nian iha prosesu ida ne’e.
3. Rejime Kompensasaun nian ba husik mamuk Imovel sira Estadu nian
Ho objetivu atu rezolve sitausaun okupasaun la lejítima no/ka ilegál bein imóvel sira Estadu ninian, Konsellu Ministru hakarak kria mekanizmu ne’ebé atu repoen legalidade kona-ba pose, maibé, sei minimiza impaktu sosiál ne’ebé bele mosu ho medida hirak ne’ebé atu foti.
