Primeiru-Ministru, Kay Rala Xanana Gusmão, iha loron 14 fulan-marsu inaugura edifísiu Balkaun Úniku iha Autoridade Administrativa Ataúru, hodi reforsa asesibilidade ba servisu públiku iha illa Atauru. Iha serimónia ne’e hetan partisipasaun hosi Ministru Administrasaun Estatál, Tomás do Rosário Cabral, Ministru Justisa, Sérgio de Jesus Fernandes da Costa Hornai, no Reprezentante Rezidente Programa Nasoins Unidas ba Dezenvolvimentu (PNUD) iha Timor-Leste, Katyna Argueta, no entidade governamentál no diplomátika sira seluk. 

Balkaun Úniku permite sidadaun sira atu hetan asesu ba informasaun no servisus públiku iha fatin ida de’it, nune’e promove desentralizasaun, hamenus burokrasia no aumenta transparénsia iha administrasaun públika. Primeiru-Ministru destaka importánsia husi servisu ida-ne’e hodi hateten katak “dijitalizasaun permite ita atu fó asisténsia ne’ebé efetivu ba komunidade. Ataúro nia estrutura, hahú hosi xefe suku to’o xefe aldeia sira, tenke garante katak Balkaun Úniku ida-ne’e utiliza ho másimu. Ida-ne’e oportunidade ida atu hakbesik instituisaun Estadu nian ba povu no hametin transparénsia.” 

Ministru Administrasaun Estatál destaka katak, iha ámbitu akordu ho PNUD, Governu iha kompromisu atu kompleta instalasaun Balkaun Úniku iha munisípiu hotu to’o tinan ne’e remata, inklui unidade Dili nian, ne’ebé sei loke iha tempu badak. Governante ne’e mós klarifika katak konstrusaun Balkaun Úniku Ataúru nian ne’e finansia husi Fundu Espesiál Dezenvolvimentu Ataúru (FEDA). 

Governu mós investe hela hodi hadi’a asesu dijitál ba servisu públiku. Iha kolaborasaun ho Ministériu Transportes no Komunikasoins no Ministériu Justisa, Ministériu Administrasaun Estatál estabelese ona liña servisu online iha suku hamutuk 459, ho projetu pilotu iha Makadade. Sistema ida-ne’e permite sidadaun sira atu uza sira-nia telemovel hodi kontakta administrasaun, hetan informasaun no rejista dokumentu ofisiál sira, hodi fasilita asesu ba servisus hanesan pasaporte, billete identidade no sertidaun. 

Iha inaugurasaun ne’e, Ministru Justisa destaka katak “konklui servisu ida-ne’e nu’udar motivu orgullu ida, iha sentidu serbisu ne’ebé la’o hela atu garante kualidade servisu públiku no benefísiu ba sidadaun sira”. Nia hatutan tan katak sistema dijitál ne’ebé adota sei permite prosesamentu lais ba dokumentu esensiál sira no apela ba Autoridade Munisipál Ataúru atu garante  manutensaun ba edifísiu ne’e. 

Balkaun Úniku Ataúru nian iha funsionáriu na’in-lima, inklui koordenadór ida, tékniku administrativu na’in-rua, kondutór ida no funsionáriu limpeza ida.

Serimónia ne’e hetan mós partisipasaun husi Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministrus Administrasaun Estatál no Justisa, embaixadór husi Indonézia, Austrália no Uniaun Europeia, Koordenadór Rezidente ONU iha Timor-Leste, reprezentantes sosiedade sivíl, forsas seguransa, lider komunitáriu no membru populasaun lokál sira. 

Iha loron hanesan, Primeiru-Ministru inaugura mós eskritóriu foun Fundu Espesiál Dezenvolvimentu Ataúro (FEDA) nian, entidade ida ne’ebé kria hodi finansia programa no projetu sira ne’ebé promove dezenvolvimentu sosioekonómiku no sustentabilidade ambientál iha rejiaun ne’e. Durante inaugurasaun, Primeiru-Ministru apela ba Diretór-Ezekutivu instituisaun nian, atu hamutuk ho nia ekipa, fó prioridade ba estudu kona-ba infraestrutura xave sira ba dezenvolvimentu illa nian.  

Vizita Primeiru-Ministru ba Ataúru inklui mós inaugurasaun ba refeitóriu foun Eskola Bázika Filiál Beloi nian. Fatin ne’ebé harii ho investimentu dolar rihun 245 ne’ebé finansia hosi Programa Dezenvolvimentu Integradu Munisipál (PDIM), ho objetivu atu apoia programa merenda eskolár no garante ambiente ida ne’ebé adekuadu ba estudante sira hodi han.