Ministru Ensinu Superiór, Siénsia no Kultura, José Honório da Costa Pereira Jerónimo, hala’o vizita traballu ida ba Repúblika Indonézia, hosi loron 2 to’o 6 fulan-marsu tinan 2025, ho objetivu atu hametin kooperasaun bilaterál iha setór ensinu superiór, siénsia no teknolojia. Durante vizita ne’e, hala’o sorumutu ho nia omólogu indonéziu, Ministru Ensinu Superiór, Siénsia no Teknolojia, Brian Yuliarto, nune’e mós ho dirijente sira husi instituisaun akadémika Indonézia nian sira, inklui Institutu Pertanian Bogor (IPB) no Universidade Kristaun Indonézia nian. 

Durante sorumutu ho Ministru Brian Yuliarto, lider na’in-rua ko’alia kona-ba habelar kooperasaun iha área ensinu superiór, peskiza sientífika, inovasaun teknolójika no interkámbiu akadémiku. Entre pontu prinsipál sira ne’ebé aborda maka fasilitasaun hodi hetan vistu estudante nian no estensaun ba validade KITAS (lisensa rezidénsia nian) ba estudante timoroan sira ne’ebé matrikula iha programa lisensiatura, mestradu no doutoramentu. Ministru Brian Yuliarto hato’o ninia kompromisu hodi fó apoiu ba estudante timoroan sira no reafirma vontade Indonézia nian atu kontinua hametin relasaun akadémika entre nasaun rua ne’e. 

Durante sorumutu ne’e, Ministru José Honório destaka importánsia hosi kooperasaun bilaterál ba dezenvolvimentu ensinu superiór iha Timor-Leste, hodi salienta katak “hametin parseria akadémika no teknolójika ne’e esensiál atu garante kualifikasaun ba ita-nia rekursus umanus no promove investigasaun sientífika”. Governante timoroan ne’e mós konvida nia omólogu atu vizita Timor-Leste hodi kontinua inisiativa kolaborasaun akadémika. 

Iha Institutu Pertanian Bogor (IPB), Ministru ho komitiva partisipa sorumutu ida ho estrutura dirijente instituisaun nian, iha ne’ebé ko’alia kona-ba programa bolsa estudu ba estudante timoroan sira. IPB kompromete ona atu fó bolsa estudu sanulu ba kursu lisensiatura nian, aleinde manifesta interese atu dezenvolve programa estájiu profisionál no atu kria Eskola Doutoramentu ida ba estudante timoroan sira. Diskute mós posibilidade finansiamentu bolsa estudu ba funsionáriu sira Ministériu Ensinu Superiór, Siénsia no Kultura nian, liuhosi Programa Fundu Dezenvolvimentu Kooperasaun Internasionál. 

Iha Universidade Kristaun Indonézia, Ministru hasoru malu ho Magnífiku Reitór, dirijente akadémiku sira no estudante timoroan sira ne’ebé estuda iha instituisaun ne’e. Durante sorumutu, esplora oportunidade sira kolaborasaun nian iha área peskiza sientífika, interkámbiu akadémiku no dezenvolvimentu programa sira ensinu ‘online’ nian. Ministru agradese ba universidade ne’ebé simu estudante nasionál sira no subliña importánsia husi parseria estratéjika sira hodi hasa’e kualidade ensinu superiór iha Timor-Leste.

Nu’udar parte ida hosi nia ajenda, Ministru José Honório sai mós nu’udar oradór prinsipál iha Semináriu Internasionál ne’ebé organiza hosi Universidade Katólika Atma Jaya iha Jakarta, ho tema “Edukasaun ba Dezenvolvimentu Sustentável iha Timor-Leste”. Iha nia intervensaun, destaka katak “edukasaun hanesan xave ba dezenvolvimentu sustentável Timor-Leste nian, no importante tebetebes atu hametin setór ensinu superiór, investe iha dijitalizasaun no promove investigasaun sientífika no teknolójika”. Eventu ne’e sura ho prezensa hosi Embaixadór Timor-Leste iha Indonézia, Roberto Soares, Reitór Universidade Katólika Atma Jaya, Yuda Turana, nune’e mós profesór no estudante sira, inklui timoroan sira ne’ebé estuda iha ensinu superiór sira iha Jakarta. 

Vizita traballu Ministru Ensinu Superiór, Siénsia no Kultura nian ba Indonézia atu reforsa kompromisu Timor-Leste nian hodi habelar kolaborasaun akadémika no sientífika ho instituisaun sira iha indonézia, ho objetivu atu kualifika rekursus umanus no dezenvolvimentu ensinu superiór iha rai-laran. Akordu sira ne’ebé hetan durante vizita ne’e, tuirmai sei inkorpora iha revizaun ba memorandu entendimentu ne’ebé asina ona entre governu rua ne’e.