……………………………………………………………………………………………………………
Komunikadu Imprensa
Sorumutu Konsellu Ministrus nian iha loron 7 fulan-marsu tinan 2025
Konsellu Ministrus hala’o sorumutu iha Palásiu Governu, Dili, no aprova projetu Dekretu Governu ne’ebé aprezenta hosi Ministru Administrasaun Estatál, Tomás do Rosário Cabral, kona-ba Kondisaun sira ba Atribuisaun Subsídiu Programa Merenda Eskolár.
Governu rekoñese importánsia nutrisaun ne’ebé adekuada ba kreximentu saudavel, aprendizajen efikás no redusaun dezigualdade. Programa Merenda Eskolár ne’e mosu nu’udar inisiativa estratéjika ida hodi garante asesu universal no ekuitativu ba refeisaun nutritiva iha estabelesimentu edukasaun pre-eskolár no ensinu báziku iha país.
Objetivu hosi programa ida-ne’e maka la’ós de’it atu kombate inseguransa ai-han no hadi’a dezempeñu eskolár, maibé mós atu promove dezenvolvimentu sustentável ba komunidade lokál sira liuhosi enkoraja produsaun no konsumu ai-han husi agrikultura lokál. Tanba ne’e, implementasaun hosi Programa Merenda Eskolár ne’e nu’udar kompromisu ida hosi Estadu ba moris-di’ak no futuru labarik sira-nian, hodi kontribui ba halakon hamlaha, hametin ekonomia lokál no dezenvolvimentu kapitál umanu timoroan nian.
*****
Ministra Saúde, Élia A. A. dos Reis Amaral, aprezenta ba Konsellu Ministrus prosedimentu aprovizionamentu ba konstrusaun edifísiu foun ida ba Ministériu Saúde, ne’ebé hahú ho Governu Konstitusionál VIII. Maibé, razaun sira iha kontratasaun hosi Governu anteriór hetan alterasaun makaas ho aprovasaun hosi programa Governu Konstitusionál IX, nune’e nia kontinuasaun sei implika uza rekursu finanseiru sira lahó benefísiu ba povu timoroan, ida ne’ebé kontráriu ho interese públiku.
Ho razaun sira ne’ebé hatuur, iha loron 3/10/2024, Ministra Saúde notifika ona Empreza ASBALAN, Unipessoal, Lda., kona-ba desizaun rezolusaun (atu hakotu) kontratu, tuir termu sira hosi alínea a) no b) númeru 1 hosi artigu 138.º hosi Dekretu-Lei n. 22/2022, loron 11 fulan-maiu, ne’ebé aprova Rejime Jurídiku Aprovizionamentu, Kontratus Públikus, no Ninia Infrasaun sira, ne’ebé altera hosi Dekretu-Lei n. 14/2023, loron 12 fulan-abril.
Empreza ASBALAN, Unipessoal, Lda., hato’o reklamasaun ida iha loron 21/10/2024, maibé ida-ne’e liu ona prazu legál (prazu iha loron 15 nian remata iha loron 18/10/2024).
*****
Konsellu Ministrus mós aprova projetu Rezolusaun Governu ne’ebé aprezenta husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, kona-ba ezonerasaun Sra. Agusta Antónia Gomes, husi kargu Vise-Diretora Ezekutiva Servisu Rejistu no Verifikasaun Emprezariál, I.P. (SERVI, I. P.) nian.
*****
Ikusliu, tuir projetu ne’ebé aprezenta hosi Ministru Petróleu no Rekursus Minerais, Francisco da Costa Monteiro, Konsellu Ministrus deside atu autoriza halo despeza ne’ebé relasiona ho programa kona-ba “implementasaun projetu Tasi Mane iha Kosta Súl nasaun nian” ho montante US$ 40.500.000.REMATA