Iha loron 21 fulan-fevereiru tinan 2025, Governu, liuhusi Ministériu Administrasaun Estatál, ofisialmente inaugura Balkaun Úniku iha Munisípiu Likisá, ne’ebé hatudu ninia kompromisu hodi moderniza no hadi’a prestasaun servisus públikus ba sidadaun sira. 

Serimónia inaugurasaun ne’e prezide hosi Ministru Administrasaun Estatál, Tomás do Rosário Cabral, ne’ebé akompaña hosi Ministru Justisa, Sérgio da Costa Hornai, no marka prezensa husi Vise-Ministru Administrasaun Estatál, Jacinto Rigoberto G. de Deus, Sekretáriu Estadu Veteranus, César dos Santos da Silva no Reprezentante Programa Nasoins Unidas ba Dezenvolvimentu (PNUD), Adeline Carrier. Marka mós prezensa husi Prezidente Autoridade Munisipál Likisá nian, Paulino Ribeiro, lideransas komunitária no reprezentantes hosi komunidade lokál. 

Balkaun Úniku mosu nu’udar sentru integradu ida ba servisu administrativu, ne’ebé permite sidadaun sira hetan asesu ba servisu oioin iha fatin ida de’it, hodi promove rapidés, simplisidade no asesibilidade. Implementasaun ba sistema ida-ne’e hanesan parte ida husi estratéjia Governu nian atu hakbesik servisu públiku ba populasaun no garante atendimentu ida ne’ebé efisiente no modernu liu, afirma Ministru Administrasaun Estatál, Tomás do Rosário Cabral. 

Ida-ne’e maka Balkaun Úniku ba datoluk ne’ebé inaugura iha país ne’e, hafoin sira ne’ebé mak estabelese iha Manatutu, iha fulan-maiu 2024, no iha Baukau, iha fulan-janeiru 2025. Governu nia objetivu mak instala servisus Balkaun Úniku iha territóriu nasionál tomak to’o 2028. Balkaun foun ne’e permite ba sidadaun sira atu hetan servisu esensiál sira iha fatin ida de’it, hodi evita viajen ne’ebé la nesesáriu, moderniza prosesu administrativu, reforsa transparénsia iha administrasaun públika no hamenus burokrasia no tempu hein nian. 

Entre servisu oioin ne’ebé disponibiliza husi Balkaun Úniku Munisipiu Likisá nian mak emisaun no renovasaun billete identidade no pasaporte, sertidaun moris no sertifikadu rejistu kriminál, hodi garante asesu ba direitu ne’ebé asegura hosi Estadu. Ho populasaun hamutuk abitantes 83.658, ne’ebé fahe ba suku 23 no postu administrativu haat, Munisípiu Likisá agora iha ona servisu públiku ida ne’ebé asesivel no efisiente liu. Atu apoia funsionamentu Balkaun Úniku, Governu distribui motór no viatura, hodi garante mobilidade boot liu ba funsionárius no ekipamentus administrativus. 

Hanesan parte ida hosi estratéjia modernizasaun administrasaun públika, entrega mós komputadór no impresora ba administradór postu administrativu sira Munisípiu Likisá nian, ho objetivu atu otimiza servisus públikus, hadi’a jestaun dadus no hamenus tempu hein nian. 

Ho inisiativa ida-ne’e, Governu reafirma nia kompromisu atu reforsa governasaun lokál no moderniza servisu administrativu sira, hodi garante servisu ida ne’ebé efisiente, asesivel no responsavel liu ba populasaun tomak.