Vise-Primeiru-Ministru no Ministru Koordenador Assuntus Sosiáis, Mariano Assanami Sabino, iha loron 18 fulan-fevereiru tinan 2025, reprezenta Xefe Governu, Kay Rala Xanana Gusmão, prezide lansamentu projetu esportasaun kraviñu ba merkadu Estadus Unidus Amérika, Fransa no Índia nian. Eventu ne’e hala’o iha instalasoins Kooperativa Kafé Timor (CCT, sigla iha lian portugés) nian, iha Akadiruhun, Dili, no hetan partisipasaun husi Vise-Ministru Komérsiu, Augusto Júnior Trindade, nune’e mós reprezentantes husi Embaixada Nova Zelándia, dirijentes CCT, ekipa kuarentena, agrikultores husi munisípiu lima no parseiru dezenvolvimentu sira seluk. 

Durante serimónia ne’e, Vise-Primeiru-Ministru hato’o ninia agradesimentu ba CCT no Governu Nova Zelándia kona-ba apoiu kontínuu ne’ebé fó ba agrikultór sira, hodi insentiva produsaun produtus orgánikus nasionais ba esportasaun. Nia hateten “Governu iha kompromisu atu kontinua fó apoiu ba setór agríkola, insentiva produsaun produtu sira ho valór ekonómiku aas no fasilita asesu ba merkadus internasionais. Ha’u agradese ba CCT no Governu Nova Zelándia ne’ebé hasa’e ami-nia produtu no apoia agrikultór sira atu nafatin halo produsaun”. 

Vise-Ministru Komérsiu, Augusto Júnior Trindade, destaka katak ida-ne’e hanesan “loron ida ne’ebé orgullu tebes ba ita-nia agrikultór sira, bainhira ita haree sira-nia produtus ne’ebé esporta ona”. “Iha tinan kotuk, ami haruka kafé no kakau ba rai-li’ur, no agora aumenta tan kraviñu. Nia hatete, Ida-ne’e hanesan avansu ida ne’ebé signifikativu, hodi konsidera katak ai-horis ida de’it bele prodús to’o 20 kg, ho valór merkadu entre dolar 5 no 7 kada kg. Rezultadu sira-ne’e hatudu katak, ho kuidadu ne’ebé loos, agrikultór sira bele hetan sustentabilidade ekonómika ne’ebé boot liu ho produtu ida-ne’e”. 

Governante ne’e hatutan tan katak Ministériu Komérsiu no Indústria nafatin iha kompromisu atu buka merkadu foun sira no promove produtus nasionais, uza mós plataforma dijitál sira ne’ebé fornese informasaun hodi fasilita ninia esportasaun.

Prezidente Kooperativa Café Timor, Mário Soares, destaka katak CCT iha membru lubuk ida iha munisípiu sira no katak, ho apoiu hosi Governu Nova Zelándia no Estadus Unidus, sira konsege kuda no mantein produtu sira ho valór ekonómiku aas iha merkadu internasionál. “Produtu sira hanesan kafé, kakau, baunilla no kraviñu iha valór ekonómiku ne’ebé boot. Membrus kooperativa fa’an produtu sira ne’e ba CCT, hodi hadi’a ekonomia família nian”, nia afirma. 

Daudaun ne’e CCT serbisu hamutuk ho parseiru dezenvolvimentu sira, prepara ona kraviñu kontentór tolu atu esporta, ne’ebé sei haruka ba Estadus Unidus, Fransa no Índia.

Serimónia ne’e marka mós prezensa, reprezentante ida husi Embaixada Nova Zelándia iha Timor-Leste, ekipa kuarentena no reprezentante ida husi ajénsia Meratus no mós diretores no funsionárius CCT nian.