Sorumutu Konsellu Ministrus nian iha loron 19 fulan-fevereiru tinan 2025
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Komunikadu Imprensa
Sorumutu Konsellu Ministrus nian iha loron 19 fulan-fevereiru tinan 2025
Konsellu Ministrus hala’o sorumutu iha Palásiu Governu Dili no, tuir projetu ne’ebé aprezenta husi Ministru Prezidénsia Konsellu Ministrus, Agio Pereira, delibera hodi nomeia Nelson Maria dos Santos Menezes nu’udar Fiskál Úniku ba Imprensa Nasionál Timor-Leste, IP. Nomeasaun ne’e konsidera ninia kompeténsia téknika no aptidaun ne’ebé rekoñesidu hodi ezerse kna’ar ne’e, ne'ebé hala'o tuir rejime komisaun servisu, ba períodu tinan haat, ho tempu-parsiál.
****
Tuir projetu ne'ebé aprezenta hosi Ministra Finansas, Santina José Rodrigues F. Viegas Cardoso, no tuir proposta ne'ebé aprezenta hosi Emiradus Árabes Unidus nian hodi asina konvensaun ida hodi evita tributasaun dupla no prevene evazaun fiskál iha área impostu sira ba rendimentu, Konsellu Ministrus delibera atu autoriza Ministra Finansas hodi halo negosiasaun ho autoridades Emiradus Árabes Unidus nian hodi aprezenta kontraproposta hodi asegura repartisaun justa husi kustu no benefísiu ida-idak entre nasaun rua no garante promosaun investimentu ida ne'ebé efetivu.
****
Ikusliu, tuir projetu ne’ebé aprezenta hosi Ministru Petróleu no Rekursus Minerais, Francisco da Costa Monteiro, Konsellu Ministrus mós delibera atu autoriza despeza ba selebrasaun Kontratu Subvensaun entre Ministériu Petróleu no Rekursus Minerais ho TIMOR GAP, EP ho montante dolar amerikanu millaun 16 ba tinan 2025. REMATA
