Toleránsia pontu iha loron 3 Novembru 2010
GOVERNU KONSTITUSIONÁL BA DA-IV
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Governu Konstitusionál ba da-IV Timor-Leste leste nian deside fo toleránsia pontu iha loron 3 Novembru 2010, Kuarta, iha parte dadeer, ba funsionáriu no ajente sira hotu hosi ministériu no servisu hirak ne’ebé sira sai dependente, nune’e mós ba institutu no organizmu hirak integra iha administrasaun indiretu Estadu nian.
Desizaun ida ne’e bazeia ba Lei n.º 10/2005, 10 Agostu, ne’ebé mak determina loron hirak feriadu nasionál nian, data hirak ofisiál komemorativu no toleránsia pontu nian no ida ne’e sai desizaun tanba loron hirak oin mai hanesan feriadu nasionál nian – Loron Santu Sira Nian no Loron Matebian nian – bele sai loron hirak ne’ebé mak ema presiza tempu atu partisipa iha selebrasaun sira.
Loron Santu Sira Nian ne’e, iha liturjia kristaun, koresponde ho festa ne’ebé mak selebra hodi hahí ema santu no mártir sira hotu, hodi nune’e mak Igreja Katólika selebra festa ne’e, Festum omnium sanctorum, iha loron 1 Novembru tuir fali Loron Matebian nian iha 2 Novembru.
Tinan ida ne’e loron hirak ne’e monu fali iha segunda no tersa ida, ne’ebé mak tau difikuldade espesiál ida ba funsionáriu sira hosi administrasaun públika, atu bele tuir serimónia omenajen ba matebian hirak hakoi iha Distritu;
Hodi haree ba sirkunstánsia ida ne’e mak, Governu entende katak, hanesan tinan hirak uluk nian, tenke fo toleránsia pontu, iha loron 3 Novembru mai, kuarta, durante períodu dadeer.
